Naalakkersuisut Michael Binzer naapissallugu saperaat
Peqataajumannginnermut pissutaavoq Tele Greenlandip Air Greenlandillu pisortarisimasaa Michael Binzer oqalugiartussanut peqataassammat.
AAMMA ATUARUK Michael Binzer undskylder pynt på sit cv
Suliffigisimasat ilinniakkallu pillugit paasissutissat peqquserluutigisimammagit, Naalakkersuisut naapissallugu saperpaat. Taamalu aalajangerneq Sulisitsisut Peqatigiiffianni siulittaasup Henrik Lethip uggoraa.
- Eqqarsaatigigukku qanoq amerlatigisut - aamma politikikkut ingerlatsinerup iluani - ukiut ingerlanerini assinganik mattunneqaratik kukkussuteqartarsimanersut, taava aalajangerneq nipaatsumik tupigusuutiginngitsoorsinnaanngilara, Henrik Leth aviisimut AG-mut oqarpoq.
Future Greenlandip ingerlanneqarnera "Siuariartorneq atugarissaarnerlu - Kalaallit Nunaata ineriartornissaanut periarfissat"-mik qulequtserneqarsimavoq, nunatsinniit avataaniillu oqalugiartussat oqallikkiartortussallu aatsaat taamak amerlatigissasut naatsorsuutigineqarpoq.
Oqallissaarisunut ilaasussat ilagaat, Michael Binzerip saniatigut, aviisimi Politikenimi aaqqissuisuuneq, Bo Lidegaard, Dansk Industrimi pisortaaneq, Karsten Dybvad professorilu Minik Rosing. Qinngarineqarpormigooq inuussutissarsiortut ataatsimiinnissaanut IA-kkormiut nuimasut, soorlu Sara Olsvig Maliina Abelsenilu, oqalugiariartoqqullugit qaaqquneqarsimanerat.
Siornatigut aporaattoqarsimanera pissutaasinnaasoq
AG-li naapertorlugu Naalakkersuisut ataatsimiinnermut peqataajumannginnerannut pissutaasoq tassaavoq, Siumup Sulisitsisullu Peqatigiiffiata akornanni annertuumik aporaattoqarsimanera, partiip utoqqaanersaata Lars-Emil Johansenip qineqqusaarnerup nalaani Brian Buus Pedersenimut saassussinerata kingorna.
- Ukiuni kingullerni GA politikkikkut suliniaqatigiiffinngorsimavoq IA-mik qanittuararsuarmik suleqatiginnittoq, allaammi assut taakkununnga assingulersimasoq, Lars-Emil Johansen Facebookimi quppernermini taama allappoq.
Brian Buus Pedersenilli akerleriinneq paasisinnaanngilaa.
- Soqutigisaqaqatigiittut soorunami politikkikkut illuatungeriit tamarmik ataatsimiinnissamut qaaqquneqarnerat pissusissamisoortutut isigaarput. Uatsinnuttaaq pingaarpoq kikkut oqalugiartussatut aggersarnerivut politikkikkut aalajangersarneqartalinnginnissaat, aviisimut AG-mut oqarpoq.
