VIDEO Kielsenip Future Greenland paasissutissanik pingaarutilinnik pissarsiaqarfigaa

Ataatsimeersuarneq Future Greenland, Nuummi ulluni makkunani ingerlanneqartoq, 400-t missaannik peqataaffigineqarpoq. Nunatsinni, Danmarkimi nunanilu allani inuussutissarsiutinik ingerlatallit peqataapput, taamatuttaarlu Inatsisartunit Naalakkersuisuniillu peqataasoqarpoq, angusaqarfiunissaalu isumalluarfigineqaqaaq.

Allattoq Pipaluk Høegh, Camilla Dam

maajip 07-at 2015 11:57

- Neriuutigaarput inuit ataatsimiinnermi peqataasut ataatsimoorluta Kalaallit Nunaata inuiaqatigiittut siuariaqqinnissaanut suliniutaasinnaasunik isummanik tigussaasunik pissarsiaqarfigisinnaassagaat, Brian Buus Pedersen, Sulisitsisuni pisortaq KNR-imut taama oqarpoq.

Naalakkersuisut siulittaasuat Kim Kielsen (s) ataatsimeersuarnerup ulluani siullermi pingaarutilinnik pingasunik pissarsisimanerarpoq.

- Pingaartutut aamma oqariartuutigineqarpoq ilinniarnerup tungaatigut qaffassaanissaq aamma aningaasaliinissamut tunngatillugu periarfissat suusinnaanersut, taavalu aamma saniatigut oqaatigineqarluni politikkikkut patajaatsumik ingerlatsinissaq pingaarutilittut isigineqartoq, Kim Kielsen KNR-imut taama oqarpoq.

Aammattaaq sulisitsisut peqatigiiffiata inuussutissarsiuteqartullu allat oqariartuutaasa naalaarnissaat qanoq pingaaruteqartigineqartoq paasisimanerarpaa.

Aamma atuaruk Suliffeqarfiit namminersortut Kalaallit Nunaat siuariartortissavaat

Aamma atuaruk Kalaallit Nunaata 'sanngeequtai' Minik Rosingip iluaqutissanngortinniarpai