QIMMIT NAPPAATAAT Pinaveersaartitsineq tunillaassiinnernik unitsitsisinnaassaaq
Qimmit nappaalallutik toqorarnerat siunissami naammaginartumik pinaveersaartinniarneqassappat, Uumasut Nakorsaqarnermut Inuussutissalerinermullu Oqartussaasuni sulisut amerlanerulertinneqartariaqartut, aalisarnermut, piniarnermut nunalerinermullu naalakkersuisoq, Karl-Kristian Kruse Ane Hansenip paragraf 37 naapertorlugu apeqquteqaataanut akilluni allappoq.
Aamma atuaruk Akiuussutissamik kapitereeraluartut toqusut amerlanerusinnaapput
- Qimmit napparsimagaangamik innaannarlutik tusarniittorujussuarmik nilliassarput. Taamaalinerani oqarfigineqartarpunga toqukkiartussagikka, Qeqertami qimmit napparsimallutik toqorarneranni nunaqarfimmi kommunefogedi Jakob Jonathansen KNR-imut oqarpoq.
Nunaqarfimmi innuttaasut qimmitik akiuussutissamik kapitinniarsaraat, Qaasuitsup Kommunianili borgmesterip Ole Dorphip KNR-imut nalunaarutigaa, Qaasuitsup Kommuniani uumasut nakorsaat sivisuumik napparsimasoq, taamaammallu akiuussutissanik pissarsiniarsarineq sivisusoq.
Suliarlu taanna pillugu, Inuit Ataqatigiit sinnerlugit inatsisartunut ilaasortaq, Ane Hansen paragraf 37 naapertorlugu apeqquteqaateqarpoq.
Aamma atuaruk Ane Hansen: Periusissiamik piareersimasoqartariaqarpoq
Aalisarnermut, piniarnermut nunalerinermullu naalakkersuisoq, Karl-Kristian Kruse akissutimini allappoq, qimmit nappaataat akiorneqassappat pinaveersaartitsinermut sunniuteqarluartoq sulissutigineqartariaqassasoq.
- Qimmit nappaalanerat malitseqartinniarlugu pinaveersaartitsineq sunniuteqarsinnaalluartoq pisariaqartinneqarpoq. Tamanna aatsaat pisinnaavoq pinngitsoorani akiuussutissanik kapisisoqartarnissaanut pilersaaruteqarnikkut aammalu qimuttoqartarnerup nalilersoqqinneratigut. Tunillaassuunnerit unitsinneqanngippata, qimmillu tamarmik eqqortumik akiuussutissanik kapitinngippata siunissami taamatut qimmit nappaalasarnerujussuat takujuassavarput, Karl-Kristian Kruse allappoq.
Aamma atuaruk Dorph aamma qimmit akiuussutissaat Qeqertamukassapput
Taamaattoq Kalaallit Nunaanni Uumasunut Nakorsaqarnermut Inuussutissalerinermullu Oqartussaaffimmi sulisut amerlineqartariaqartut Karl-Kristian Kruse akissummini aallappoq.
Qeqertamilu qimmit napparsimallutik toqorarunnaamisut, nunaqarfimmi kommunefogedip, Jakob Jonathansenip ullumi oqaluttuaraa.
- Immaqa sapaatip akunnera kingullerli taamatut toqorartoornerit tusassaarpagut, Qeqertami kommunefogedi Jakob Jonathansen oqarpoq.
Aamma atuaruk Qeqertami qimmit 70-it toqunneqartariaqartut
Aamma atuaruk Dorph uumasut nakorsaanik kissaateqarpoq
Uumasunut Nakorsaqarnermut Inuussutissalerinermullu Oqartussaaffimmi sulisut amerlineqarnissaannik Naalakkersuisut pilersaaruteqarnersut pillugu aalisarnermut, piniarnermut nunalerinermullu naalakkersuisoq, Karl-Kristian Kruse KNR-imit apersorniaraluarparput, akissutiminulli innersuussivoq tamatumalu saniatigut oqaaseqaqqinniarnani nalunaarluni.
Aamma atuaruk Qeqertamut Saqqamullu qimusserlunilu qamuteralannik angallattoqaqqusaajunnaarpoq
Aamma atuaruk Allaffisorpallaarneq pissuttaalluni qimmit toqorarput
