QIMMIT NAPPAATAAT Akiuussutissamik kapitereeraluartut toqusut amerlanerusinnaapput
Qimmit tamarmik akiuussutissamik kapineqareeraluartut toqusut amerlanerulersinnaasut, uumasut nakorsaat oqarpoq.
- Naatsorsuutigisinnaavarput qimmit amerlanerit toqussasut, tamatumunnga pissutaavoq qimmeqatigiit akornanni qimmit nappaataannik tunnillatsittoqarsinnaammat napparsimalerlutillu, Qaasuitsup Kommuniani uumasut nakorsaat Sanne Wennerberg taama oqarpoq. Sanne Wennerberg sivisuumik napparsimanermi kingorna suliffimminut uteqqammerpoq.
Aamma atuaruk Ane Hansen: Periusissiamik piareersimasoqartariaqarpoq
Qimmiutillit pisussaapput akisussaasuullutillu qimmiutimik qimmit nappaataannut akiuussutissamik kapineqarnissaannut, uumasut nakorsaat oqarpoq.
- pisortat tamanna akisussaaffiginngilaat.
- Qimmit nappaataannut akiuussutissanik qimmit kapineqarnissaat kommunit imaluunniit Namminersorlutik Oqartussat akisussaaffiginngilaat, tamannali qimmiutilinnut neqeroorutaavoq qimmiutimik nappaatinut illersorluarneqarnissaannut atugassat, tamannalu nutaarsiassaanngilaq, qimmiutillit tamanna nammineq nalunngilluinnarpaat aamma ilisimavaat qimmit nappaataat nalaanneqarsinnaasoq namminerlu isumagisussaavaat aamma namminneq akilertussaavaat, uumasut nakorsaat oqarpoq.
Aamma atuaruk Dorph aamma qimmit akiuussutissaat Qeqertamukassapput
Qeqertami qimmit 75-it toquttariaqarnerannut pissutaavoq, qimmit nappaataannut akiuussutissat uumasut nakorsaata najugaqarfiani sikaavimmi parnaarussimasut kommunimit pissarsiarineqarsinnaasimanngimmata.
- Pisoq tamanna immikkut illuinnartuuvoq, pisut nalaatsornikkut ataatsikkut pipput taamaattumik siunissami tamassuma aaqqiissutissaanik nassaarniartariaqarpugut, Sanne Wennerberg oqarpoq
Aamma atuaruk QIMMIT NAPPAATAAT Dorph uumasut nakorsaanik kissaateqarpoq
Sanne Wennerbergip kommuninut allanut kaammatuuteqarpoq qimmit nappaataannut akiuussutissat kommunit isumagissagaat, soorlu Qeqqata Kommuniani Sisimiut taama iliortut.
- Taava neriuutigineqarsinnaavoq, Qeqertami qimmerpassuit toqusimanerat pissutigalugu illoqarfinni allani oqartalissasut, aamma uagut akiuussutissamik uninngasuuteqartalissaagut, taava innuttaasut aggerlutik tamakkuninnga pisisinnaassapput, Qaasuitsup Kommuniani uumasut nakorsaat Sanne Wennerberg taama oqarpoq.
Qeqertami qimmit amerlasuut toqunerat pissutigalugu, qimmit nappaataannut akiuussutissat Qeqertami atorneqartussat Qaasuitsup Kommunianit akilerneqartut uumasut nakorsaat ilanngullugu oqarpoq.
Qimmiutillit uumasut nakorsaannit kaammattorneqarput qimmit pitussimateqqullugit qimmit nappaataannit tunillaasuutinnginniassammata.