QIMMIT NAPPAATAAT Dorph uumasut nakorsaanik kissaateqarpoq

Qaasuitsup Kommuniani uumasut nakorsaannik marlunnik allaffimmiumillu atorfeqartitsisoqarsimavoq, sipaaniarnerlu pissutigalugu uumasut nakorsaata aappaata allaffimmiullu atorfii atorunnaarsinneqarput, Tamanna naammaginanngilaq borgmesteri isumaqarpoq.

Når jeg bliver stor, vil jeg også trække tunge slæder

Allattoq Jaaku Lyberth, Jonas Løvschall-Wedel

januaarip 28-at 2016 08:08

Qaasuitsup Kommunia uumasut nakorsaanik qimmit akiuussutissaannik isumaginnittussamik amigaateqarpoq.

Taama oqarpoq Qaasuitsup Kommuniani borgmesteri Ole Dorp taassuma uggornartippaa kommunemi uumasut nakorsaat marluusut aappaa Namminersorlutik Oqartussat sipaarnianerminni atorunnaarsimmassuk.

Aamma atuaruk VIDEO Allaffisorpallaarneq pissuttaalluni qimmit toqorarput

- Qaasuitsup kommuniani 12.000-nik qimmeqarpoq, taakkua arlaatigut ajornartorsiutigineqarput, taakkua akiuussutissamik tunineqarsinnaanerat aaqqinniarlugu iliuusissamik ujartuilluni Namminersorlutik Oqartussanik oqaloqateqarnissaq pisariaqartinneqarpoq, Ole Dorph oqarpoq.

Qaasuitsup kommuniani uumasut nakorsaat sivisuumik napparsimalluni nalunaaruteqarpoq, maannalu Qaasuisutsup Kommuniani uumasut nakorsaqarniarneq pillugu Namminersorlutik Oqartussanit akissutissarsinissaq utaqqineqarpoq.

Taamaalinerani Qeqertami Ilulissat eqqaani qimmit 70-it qimmit nappaataannik napparsimallutik toqupput.

Aamma atuaruk QIMMIT NAPPAATAAT Qeqertamut Saqqamullu qimusserlunilu qamuteralannik angallattoqaqqusaajunnaarpoq

Qimminut akiuussutissat kommunemit pissarsiarineqarsinnaanngillat, uumasut nakorsaata najugaqarfiani inissisimammata. Uumasut nakorsaat napparsimavoq aallaqqallunilu, immikkullu ittumik iliuusissamik aallartitsisoqarani.

- Namminersorlutik Oqartussat uumasut nakorsaannik Qaasuitsup Kommuniani atorfinitsitsinngippata kommune uumasut nakorsaannik atorfinitsitsisinnaanissaq oqaluuserineqartariaqartoq borgemsteri oqarpoq. Tamanna pillugu Namminersorlutik Oqartussanik oqaloqateqarnissaq pisariaqartinneqarpoq.

- Uumasut nakorsaata aamma allaffimmiup sipaarutigineqartup atorfinitseqqinneqarnissaat kissaatigalugu Namminersorlutik Oqartussanik oqaloqateqarnissaq pisariaqartinneqarpoq, Ole Dorph oqarpoq, - tamanna pisinnaanngippat Qaasuitsup Kommuniani immikkut uumasut nakorsaanik atorfinitsitsinissaq eqqartortariaqassavarput, taamaattumik piffissami qanittumi Qaasuitsup Kommuniata aamma Uumasut Narkorsaata qullersaqarfia ajornartorsiut pillugu pinngitsoorani oqaloqatigiissutigisariaqarpagut, Qaasuitsup kommuniani borgmesteri Ole Dorph oqarpoq.

Qaasuitsup Kommuniani uumasut nakorsaannik marlunnik allaffimmiumillu sulisoqarsimavoq. Sipaarniarneq pissutigalugu uumasut nakorsaata aappaa allaffimmiullu atorfii atorunnaarsinneqarput.