QIMMIT NAPPAATAAT Ane Hansen: Periusissiamik piareersimasoqartariaqarpoq
Qaasuitsup Kommuniani uumasut nakorsaat napparsimammat, qimmit nappaataannut akiuussutissat
pissarsiarineqarsinnaannginnerisa kingunerisaanik Qeqertami qimmit 70-it sinneqartut toqunneqartariaqarput.
- Naalakkersuisut akisussaasut pisunut taamaattumut, sillimaniarneq eqqarsaatigalugu najoqqutassanik erseqqarissunik najoqqutassiortariaqarput, Ane Hansen oqarpoq.
Aamma atuaruk QIMMIT NAPPAATAAT Dorph aamma qimmit akiuussutissaat Qeqertamukassapput
Qaasuitsup Kommuniani uumasut nakorsaat sivisuumik napparsimalluni nalunaarpoq.
- Pissutsit taamaannerat akuerineqarsinnaanngillat, inuup ataatsip napparsimalernera pissutigalugu suut tamarmik unittuussaanngillat, taamaattumik suut tamarmik unittuussannginnerannik najoqqutassanik allaqqasunik piareersimasoqartariaqarpoq, Ane Hansen taama oqarpoq.
Qimmit nappaataannut akiuussutissat uumasut nakorsaata napparsimalluni aallaqqammat pissarsiarineqarsinnaanngillat, Qaasuitsup Kommuniani borgmesteri Ole Dorph oqarpoq.
Aamma atuaruk QIMMIT NAPPAATAAT Qeqertami qimmit 70-it toqunneqartariaqartut
Taamatut pisoqarnerani kommuni periusissiamik piareersimatitaqanngilaq.
- Qaasuitsup Kommuniani sillimaniarnermut piareersimatitanik soqanngilaq, uumasut nakorsaat Namminersorlutik Oqartussani atorfeqartitaavoq, uagut kommunimi uumasut nakorsaanik atorfeqartitsinngilagut, Ole Dorph oqarpoq.
Kommuni aamma Naalakkersuisut periusissiamik piareersimatitaqartariaqartut, Ane Hansen isumaqarpoq.
- Naalakkersuinikku piaartumik iluuseqartoqartariaqalerpoq, qimmit napparsimaneranni iliuusissanik ersarissumik allassimasunik peqartariaqarpoq, Inuit Ataqatigiit sinnerlugit inatsisartuni ilaasortaq Ane Hansen taama oqarpoq.
