Politikki

QIMMIT NAPPAATAAT Qeqertamut Saqqamullu qimusserlunilu qamuteralannik angallattoqaqqusaajunnaarpoq

Qeqertaq qimmit nappaataata qimmit akornanni atugaalernera pissutaalluni Qaasuitsup Kommuniata erngerluinnartumik kaammattuutigaa Saqqamiit Qeqertamiillu, Saqqumullu Qeqertamullu qimussimik qamuteralannillu angallanneq tamarmi unitsinneqassasoq.

Allattoq Mads Lynge

januaarip 27-at 2016 15:40

Qaasuitsup Kommuniata, Aalisarnermut, Piniarnermut Nunalerinermullu Naalakkersuisoqarfik ullumi pingasunngornermi januaarip ulluisa 27-anni isumasioqatigereerlugulu, kommuni, Naalakkersuisoqarfik politiillu taama aalajangerput. Qaasuitsup Kommuniani Pisortaqarfiit Allaffiat tusagassiuutinut taama nalunaaruteqarpoq.

- Taama kaammattuuteqarneq ullumimiit sapaatip akunnerinik pingasunik sivisussuseqartumik atuutissaaq, ullumi pingasunngornermi januaarip ulluisa 27-anniit pingasunngorneq februaarip ulluisa 17-iat ilanngullugu kaammattuut atuutissalluni, Qaasuitsup Kommunia taama ilaatigut allaaserisaqarpoq.

Kommuni Naalakkersuisoqarfiillu januaarip ulluisa 28-anni isumasioqatigeeqqissasut nalunaarutigineqarpoq, isumasioqatigiittoqareerpallu kapuinissamut tunngassuteqart pillugit suliniutillu allat suut ingerlanneqassanersut pillugit ilisimatitsissummik nassiussisoqarumaartoq aamma nalunaarutigineqarluni.

Innuttaasut kommunimit ataavartumik aamma ilisimatinneqartarumaartut oqaatigineqarpoq.

Qeqertami qimmit 60-it 70-illu akornanni maannamut toqusimasut, Qeqertami qimmilerisup nalunaarutigaa, amerlinissaallu aamma ilimagineqartariaqartoq oqaatigalugu.

Aamma atuaruk Allaffisorpallaarneq pissuttaalluni qimmit toqorarput

Aamma atuaruk Qimmit Qeqertami napparsimallutik toqorarput