VIDEO Qimmit Qeqertami napparsimallutik toqorarput

Qimmit 20-it toqusimasut Namminersorlutik Oqartussanit nalunaarutigineqarpoq.

Kisianni Kalaallit Nunaanni Qimussertartut Kattuffiani, KNQK-imi, siulittaasoq Mikkel Jeremiassen oqarpoq, 40 sinnerlugit toqusimasut.

Aamma atuaruk Nunaqarfinni marlunni qimmit qimmit nappaataannik toqquteqarsimasorineqartut

Nunaqarfimmilu Qeqertami innuttaasut 120-ummata tamanna ajunaarnertut taaneqartariaqartoq, taanna aamma oqarpoq.

Anina Hansenip Qeqertami najugaqartup qimmini arlallit napparsimallutik toqusut isiginnaarpai.

- Qimmiutigut massakkuugallartumut 26-it toqupput, Anina Nielsen oqarpoq.

Ajunaarneq

Taassuma qimmii nappaammik eqqorneqarnerpaanut ilaasut Mikkel Jeremiassen oqarpoq.

Qeqertami qimmit 40-ut sinnerlugit napparsimallutik toqusimasut taanna paasitinneqarsimalluni.

Tamannalu alianartuusoq siulittaasoq oqarpoq.

- Qimussertartut kattuffiannit soorunami pissutsinik taamaattunik ilaasortatta atugaqarnerat akuerisinnaanngilarput, aamma alianartuuvoq. Ilami nunaqarfeeqqami qimmit 40-ut qimmerparujussuupput. Taamaattumik ajunaarnertut taasariaqarpoq, Mikkel Jeremiassen oqarpoq.

Akiuussutissanik kapuuteqanngitsoq

Inatsit naapertorlugu qimmit tamarmik nappaammut akiuussutissamik kapitittussaapput. Kisianni qimmit ilaannaat kapitittartut Anina Nielsen oqarpoq.

Kapuutinik akiuussutissalinnik kommunimut qinnuteqartaraluarlutik, taanna oqaluttuarpoq.

- Taava oqassapput ukuinnaat kapitissinnaapput, kapuutinik amigaateqarnerput pissutigalugu, Anina Nielsen oqarpoq.

Tamannatullu paasitinneqartarneq naliginnaasuusoq, Mikkel Jeremiassen oqarpoq. Aamma Ilulissani akiuussutissaateqarnersut sapaatip akunnerata siuliani paasiniaasimavoq.

- Pingasunngormat, januaarip 20-ani Qaasuitsup Kommuniani tamakkulerisoq pulaarakku oqarpoq, 2015-imili, tassa siornali, Ilulissani nungutsisimasut. Tamanna akuerineqarsinnaanngilaq, Mikkel Jeremiassen oqarpoq.

Qaasuitsup Kommunia tamaat

Tamannalu kommunimit uppernarsarneqarpoq.

- Qaasuitsup Kommunia tamaat, Kangaatsiamit Qaanaaq tikillugu, tassani pineqarpoq, Qaasuitsup Kommuniani pilersaarusiornermut pisortaq, Hanne Andersen oqarpoq.

Tamannalu Kommunimi uumasut nakorsaqarallannginneranik pissuteqartoq, Andersen oqarpoq.

- Qaasuitsup Kommuniani uumasut nakorsaat piffissami sivisuumi napparsimavoq. Taamaammat nakorsaatinik maanna pissarsisinnaanngikkallarpugut, Hanne Andersen oqarpoq.

Aamma atuaruk Savissivimmi qimmit nappaalanerat virusimik aallaaveqarsimavoq

Qimminut akiuussutissanik sapaatip akunnerisa arlaqanngitsut qaangiuppata apuussisoqassasoq Hanne Andersenip naatsorsuutigaa.

Taassuma aamma erseqqissarpaa, qimminit nappaatigineqartoq inunnut tunilunneq ajortoq.