Savissivimmi qimmit nappaalanerat virusimik aallaaveqarsimavoq

Uumasunut nakorsaqarnermi immikkoortortaqarfik Inuussutissarsiornermut suliffeqarnermullu Naalakkersuisoqarfiup ataaniittoq Uumasut Nakorsaqarfiannit Københavnimiittumit ippassaq akissutisineranit tamanna uppernarsarneqarpoq. Qimmit nappaammik taassuminnga tunillatsissimasut katsorsarneqarsinnaanngillat taamaattumillu Uumasunut Nakorsaqarfimmit qimmiutillit tamarmik kaammattorneqassapput qimmit nappaataannut akiuussutissamik qimmitik tamaasa kapineqarnissaat isumagissagaat.

Qimmit akiuussutissaannik kapitinneq akeqanngilaq, tamanna Namminersornerullutik Oqartussat akilissammassuk, Inuussutissarsiornermut Suliffeqarnermullu Naalakkersuisoqarfik tusagassiuutinut nalunaaruteqarnermi taamatut allappoq. Qimuttunik qimmiutillit uumasut nakorsaanit Mads Thor Madsen-imit kaammattorneqarput Kommuniminni qimmilerisoq qaninnerpaaq attavigeqqullugu qimmit akiuussutissamik kapitinnissaat isumagineqassagaat.

Uumasut nakorsaata erseqqissarpaa qimmit tamarmik aamma Savissiviup avataaniittut akiuussutissamik kapineqassammata, aammalu erseqqissarlugu qimmit akiuussutissamik kapineqartassammat siullermik kapitinneranit ukiut pingasut qaangiukkaangata.