QIMMIT NAPPAATAAT Qeqertami qimmit 70-it toqunneqartariaqartut

Qeqertami Ilulissat eqqaani qimmit nappaammik eqqugaapput. Manna tikillugu qimmit napparsimasut 70-it toqunneqartariaqarsimapput. Qeqertami qimmit kingullermik kisinneqaramik 260-it missaannik amerlatigisimagaluarput, Illu Sullissivimmit taamanna nalunaarutigineqarpoq.

Allattoq Jaaku Lyberth, Thomas Munk Veirum

januaarip 28-at 2016 13:19

Qeqertami qimmilerisoq Jakob Nathanielsen ulluni makkunani suliassaleqinngilaq. Qimmerpassuit napparsimapput toqorarneqartariaqarlutillu.

- Qimmit napparsimaleraangamik innaannarlutik nilliasarput tusarniitsorujussuarmik taamaaligaangata oqarfigineqartarpunga, kingorna toqukkiartortarpakka, Qeqertami qimmilerisoq Jakob Jonathansen taama oqarpoq.

Jakob Jonathansen nunaqarfimi angalaarpoq qimminillu napparsimasunik naammattoorsigaangami imaluunniit napparsimasoqarneranik nalunaarfigineqaraangami qimmit toquttarlugit. Qimmit tallimat ippassaq toquttariaqarsimavai ullaarmannalu qimmit pingasut toquttariaqarsimallugit.

Aamma atuaruk Dorph uumasut nakorsaanik kissaateqarpoq

Nunaqarfimmi Qeqertami qimmerpassuit napparsimallutik toqorarput. Qimmit qimuttut 260-usimagaluartut taakkunannga 70-it missaanniittut toqunneqartariaqarput, Qeqertami illu sullissivimmit tamanna nalunaarutigineqarpoq, Qeqertami innutaasut 118-iuput.

Jakob Jonathansenip ernera 21-nik qimmeqarsimagaluarpoq taakkunannga aqqanillit toqunneqartariaqarsimapput. Qimmit taama amerlatigisut annaasariaqarlugit misigissutsikkut attortinnarpoq

- Assorujussuaq inuttut attortisimanarpoq qimmit sualummik pigisat toqorartut isigalugit assorsuaq avaanngunarpoq attortisimanarlunilu, Qeqertami qimmilerisoq Jakob Jonathansen taama oqarpoq.

Aamma atuaruk Qeqertamut Saqqamullu qimusserlunilu qamuteralannik angallattoqaqqusaajunnaarpoq

Qaasuitsup kommunia innutaasunut kaammattuuteqarpoq Saqqamiit Qeqertamiillu kiisalu Saqqamut Qeqertarmullu qimussimik qamuteralannillu snecooterinik angallanneq tamarmi unitsinneqassasoq. Saqqami qimmit qimmit nappaataannik eqqugaanngillat.

Qaasuitsup Kommunia aamma Aalisanermut piniarnermullu Naalakkersuisoqarfik sisamanngornermi 28. januar isumasioqatigeeqqissapput Isumasioqatigiinneq pereerpat kapuinissamut tunngassuteqartut pillugit kiisalu suliniutit allat suut ingerlanneqassanersut pillugit ilisimatitsisoqarumaartoq nalunaarutigineqarpoq.

Aamma atuaruk Allaffisorpallaarneq pissuttaalluni qimmit toqorarput

Aamma atuaruk Qimmit Qeqertami napparsimallutik toqorarput

Aamma atuaruk Nunaqarfinni marlunni qimmit qimmit nappaataannik toqquteqarsimasorineqartut