EU pillugu innuttaasunik taasititsineq: Danskit naaggaarput

Taasiartortullu ilimagisamit amerlanerusut aamma nalunaarutigineqarpoq. Qinersisinnaatitaasummi 72 procentii taasiartorsimapput. Taasiartortut taama amerlatiginerat qinersinernut taasinernulluunniit tunngasunut immikkut ilisimatusarsimasup Kasper Møller Hansenip, Københavnip universitetianeersup uissuummissutigaa:

- Taasiartortussat 60 procentit missaanniinnissaat eqqoriaraluarpara. Danmarkimilu innuttaasut akornanni amerlasuut politikerinut tatiginnippallaannginnerat eqqarsaatigalugu 72 procentit taasiartornerat immikkut maluginiagassaavoq, taasissutigineqartussarlu paasiuminaassinnaanera aamma eqqarsaatigineqartariaqarpoq, Kasper Møller Hansen oqarpoq, politikkikkullu piffissami kingullermi eqqissisimannginnerup innuttaasunut sunniuteqarsimanerat aamma tikkuarlugu.

AAMMA ATUARUK Qallunaat naaggaarput

- Qimaasut pillugit ajornartorsiutit annertuut, qimaasut pillugit inatsisinik sukaterinerit, Parisimi peqqarniisaarniarnerit, russillu timmisartui nakkartinneqartut qaammatini kingullerni malunnaateqarsimapput, Kasper Møller Hansen oqarpoq.

Danmarkimilu innuttaasut parteertik amerlasuutigut tunussimavaat, assersuutigalugu Folketingimut qinersisoqartillugu qinertagartik tunussimallugu.

Pingaartumik Socialdemokratit SF-ikkullu qinersisaat partiimi taasititsinermut atatillugu innersuussutaat tunussimavaat, partiilu Venstrep qinersisaasa 30 procentii aamma naaggaarput.

Danmarkimi qinersiviit katillugit 92-iupput, taakkunannga taamaallaat 21-t akuersillutik.