Takornariat tuttoqarfinni katersuuttut: Karstenip tamanna filmiliaraa, maannalu filmiliaa siammarsimavoq

Kangerlummi piniarnerup nalaani takornariat amerliartuinnarnerat akornutaavoq. Tuttunniartoq piniarnerminik unitsitsisariaqarsimavoq inuppassuillu qimallugit avalattariaqarsimalluni - maanna ataavartumik aaqqiissutissarsiortoqarnissaanik kaammattuivoq.

Allattoq Ivalu Nivi Johansen

aggustip 13-at 2025 07:36

Nutserisoq Karla Heilmann

Aavarfiup aallarteqqammernerani Karsten Fleischer Rex ilaquttanilu tuttunniariartorlutik aallarput, kisiannili umiatsiat gummibådit takornarianik ulikkaartut naammattoorpaat.

- Piniariartarfitsinnit allamut eqqissisimanarnerusumut aallassalluta isumaqatigiippugut. Tamanna pakatsinaqaaq, Karsten Fleischer Rex oqarpoq.

Ullaaralaamit ullullu sinnerani takornariat gummibådii illuaqqami eqqaani ingerlaartut takusimallugit KNR-imut oqaluttuarpoq. Taassuma ulloq taanna inuit gummibådiniittut 200-t missaanniissangatippai.

Sumiiffinni mikisuni inuppassuit

Kangerluk iluliarasaartoq kusanaqisoq takornariat takorusussagaat Karsten Fleischer Rexip paasilluarsinnaavaa, takornarialli taama amerlatiginerujussui tupaallaatigaa.

Takornariaqartarnerup nakkutigineqarsinnaanissaa ajornakusoorsinnaassasoq taanna isumaqarpoq, uumasullu ingerlaarfigisannaavinit qimaatinneqarnissaat annilaanngatigaa.

- Inunnit takkussuuttunit ikinnerusuninngarnit takornariat 200-it tikiuppata, taakkulu tuttunit naamaneqarlutillu, takuneqarlutillu tusaaneqarpata, sumiiffimminnit sivisunerusumik qimaaqqanissaat ilimagaara.

Karsten Fleischer Rex tuttunniarfissaminit aallartariaqarsimavoq eqalunniaannartariaqarlunilu, tuttunniarnissamummi eqqissisimananngippallaarmat.

Iliuuseqartoqarnissaanik kissaateqartoq

Taassuma takornariat umiartortinneqartut Facebookikkut siammarterpai. Taanna maanna nunarsuaq tamakkerlugu takuneqareersimalerpoq.

- Tamanna arlalinnit ernummatigineqarnera pissutaasoq isumaqarpunga.

Nunatsinni takornariaqangaatsiarneranut tunngatillugu akeriittoqalersinnaanera taassuma nukillalaarnartoqartippaattaaq.

Inuiaat tamakkerlutik piniariartarfinni takornariat amerlassusaat pillugit oqallittariaqartut taanna isumaqarpoq. Takornarialerisut angallassinernik aaqqissuisuusut maaniittuaannartussaasut miserratiginngilaa oqarlunilu:

- Issiaqatigiilluni kinguneqartussamik iliuuseqartoqartariaqartoq isumaqarpunga. Qanoq iliuuseqartoqarsinnaanersoq paasiniaasoqartariaqarpoq.

Ukioq manna tuttumik pisaqareerpit?

- Aap pisaqareerpunga, kisianni piniariarfinnaanniunngitsoq. Sumi tamaanimi takornariaqarpallaartillugu taamaaliorsinnaanngilanga.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.