Isornartorsiorneqartumi Greenland Airportsimi ingerlatsinermut pisortaq soraartoq

Greenland Airportsimit naalakkersuisuniillu akissummik apriilip 15-iat nalunaaqutaq 13.30 nutarterneqarpoq.

Henrik Estrup Greenland Airportsimi ingerlatsinermi pisortatut soraarpoq, mittarfinnillu ulluinnarni ingerlatsinermut akisussaajunnaarluni.

Greenland Airports tusagassiuutinut nalunaarummi allappoq.

Soraarnera suliffeqarfiup Nuummi nunanut tamalaanut mittarfiup siorna novembarip 28-aniilli assigiinngitsunik unammillinnartoqarnerata kingunerisaanik piffissami ilungersunartorsiuleruttornerani pivoq.

Suliffeqarfimmi sulisussaaleqineq pissutigalugu Nuummi Mittarfimmi kiffartuussinerup pitsaassusaa nakkutilliivimmilu kinguaattoornerit ilaatigut ajornartorsiutigineqarput.

Tamatuma saniatigut piffissami aggersumi annertuunik pisoqartussaavoq. Ilulissani Qaqortumilu mittarfiit nutaat pilersaarut malillugu aappaagu ammartussaapput.

Pisortani nikisitsineq suliffeqarfimmi immikkut ittumik ataatsimeersuartoqaratarsinnaanera sioqqullugu aamma pivoq.

Tamanna Siumumit Erik Jensenip juulimi piumasaqaatigaa, naalakkersuisullu siulittaasuata, Jens-Frederik Nielsenip (D) ataatsimeersuartoqangalersoq Sermitsiamut oqaatiginikuuaa.

Aqutsisuni nikisitsinissamut piffissaalluartoqanngisaannartoq

Greenland Airportsip pisortaanerata, Jens Lauridsenip aqutsisuni atorfinni allanngortitsinissamut piffissaalluanngisaannartoq oqaatigaa.

– Nuummi Mittarfiup ammarnerata aammalu Ilulissani Qaqortumilu mittarfittaassat ammarnissaannut piareersarnerit akornanni ikaarsaariarfimmiippugut. Tamanna nikisiterinissamut periarfissiivoq, Jens Lauridsen Henrik Estrupip suliaqangaatsiarneranut qujassuteqarluni oqarpoq.

Suliffeqarfik ingerlatsinermut pisortamik ”mittarfiit ingerlanneqarnerannik nukittunerusumik niuernermillu ukkatarinnissinnaasumik” pisariaqartitsisoq, Jens Lauridsenip oqaatigaa.

Ingerlatsinermullu pisortassarsinissap tungaanut pisortaq, Niels Grosen Jens Lauridsen peqatigalugu ingerlatsinermut immikkoortortaqarfimmik ingerlatsisuussapput.

Greenland Airports: Siumut ingerlavoq

KNR-ip Nuummi mittarfimmut sulisussarsiorneq ajornartorsiutinillu aaqqiissuteqarniarneq qanoq ingerlanersoq Greenland Aiports apeqquteqarfigaa.

Suliffeqarfik "ilorraap tungaanut ingerlasoqartoq" neriulluartillu allakkatigut akissutigaat. Arlalinnik nutaanik sulisoqalerpoq, isumannaallisaanermillu akuerineqarsimallutik, arlallillu aamma sulilingajalersut, Greenland Airports allappoq.

- Suliassaavoq, kisianni suliffinnut pilersaarutinut atatillugu maannakkut isumatusaarnerusoqarpoq, tamannalu soorunami arlallit isumannaallisaanermi akuerineqarnissaasa inissinnerata ilutigaa, suliffeqarfik allappoq.

Suliffeqarfimmi annertuumik nikiterisoqalernersoq imaluunniit arlalinnik allannguuteqartoqalernersoq KNR-ip aamma apeqqutigaa.

Greenland Airportilu tassunga atatillugu tusagassiuutinut nalunaarumminni allassimasut aallaqqaammut pilersaarutigalugit akiussuteqarpoq.

KNR-ip naalakkersuisut oqaatigisamisulli qaqugu immikkut ittumik ataatsimeersuartitsiniarnersut aamma paasiniaaffigai.

Naalakkersuisut siulittaasoqarfiata Namminersorlutik Oqartussat suliffeqarfiutaannut atatillugu immikkut ittumik ataatsimeersuarnerit pilersaarusiorneqaleruttortut septembarillu ingerlanerani pissasut paasissutissiissutigaa. Tamatuma saniatigut ingerlatsiviit tamarmik ukiap ingerlanerani naligninnaasumik ataatsimeersuarumaartut allappaat.