Qaqortumi utoqqaat illuanni sulisussaaleqisoqangaatsiartoq
Qaqortumi utoqqaat illuat Ajarsivasik sulisussaaleqingaatsiarpoq. Sulisussaaleqisoqangaarmallu sulisut sinneruttut ulloq unnuarlu sulisariaqartarput.
Killissarlu maanna anguneqartut sulisutuanngortut ilaat marluk isumaqarput.
- Sulisut ima amigartigisarput ullaakkut suliartoraangatta ualikkoortussaqanngitsoq ingerlaqqiinnartariaqartarpugut, ilaanni ataasinngoriartortoq aatsaat soraartariaqartarluta, Tanja Nedergård sulerulunnerminit eqqugaasimasut ilaat oqarpoq.
Taanna stressimik eqqugaaqqammerpoq, maannali Ajarsivasimmut uteriartulerluni, taassuma uternini sulisunut sinneruttunut oqilisaataasinnaassasoq neriuutigaa.
Igaffimmiut imaluunniit inulerisut
Sulisussaaleqineq annertungaarmat igaffimmi ilinniartut, eqqiaasut errorsisarfimmilu sulisut utoqqarnik isumaginnittussanngortinneqartarput.
Ajarsivik 48-nut inissaqartitsivoq. Ineqartunut 20-nut qulinik sulisoqartussaagaluarpoq, maannali sulisut sisamaannaasut, sulisutuanngortut ilaata, Ingeborg Jakobsenip oqaatigaa.
- Utoqqaat malillugit oqarnerat unnuarsiortartut takkutinngitsoornerani unnuarsiortoqanngitsoortoqaqattaarpoq ullut kingullertigut. Utoqqaat naammagittaalliortukuluupput, Ingeborg Jakobsen oqarpoq, taassumalu sulisussaaleqineq ineqartut eqqiluisaarnerannut aamma sunniuteqartoq erseqqissaatigaa.
- Uffaanngitsoornerit, tamakku utoqqaat ilaat oqarneratuut ataasiakkaat soorlu qaammat ataaseq marlulluunniit uffanngitsoorneqarsinnaasarput, Ingeborg Jakobsen oqarpoq.
Qaangiuttoornerit sulinngiffiusussaasut
Tina Nedergårdip Ingeborg Jakobsenillu kommunimi sulinertik pissutigalugu suliffissaminnik qaangiuttooqqusaanatik erseqqissaatigaat.
- Taakku suliffissamik qaangiuttoornerit aningaasanngorlugit tigusinnaanngilagut ajoraluartumik. Afspadserinngortinneqartarput.
- Immaqa massakkoqqinnaaq sulisussaaleqinerani isumaqarpunga aningaasat suliffissamik qaangiuttoornerit aningaasanngorlugit tiguneqartalertuuppata, sulisunut sinneruttunut pitsaanerpaassagaluartoq, Tina Nedergård oqarpoq.
Tina Nedergårdip SIK attaveqarfigisimanerarpaa, taannali QSIP-mit takkuttoqarumaartoq akineqarnikuuvoq, KNR-illi sulisut sapaatip akunnerata siornali oqaloqatigigamigit suli takkuttoqarani, Tanja Nedergårdillu suliaq arriippallaarsoraa.
- Iliuuseqartoqartariaqarpoq. Utoqqaat ilungersorlutik sulereernikuullutik taqqanna angerlarsimaffigivaat eqqortumik sullineqarnissaat eqqissillutik utoqqaliartornissaat uanga kissaatiginerugaluarpara, Tanja Nedergård oqarpoq.
