Lars-Emil Johansen aamma Lars Møller-Sørensen pinngitsuutinneqartut

Peqquserluttuliorneq pillugu suliami, Lars Møller-Sørensenip aamma Lars-Emil Johansenip unnerluutigineqarneranni eqqartuussuteqartoqarpoq.

Naalakkersuisut siulittaasorisimasaat politikeriusimasorlu, Lars-Emil Johansen Lars Møller-Sørensenilu Nunatta Eqqartuussisuuneqarfianit pinngitsuutinneqarput.

Eqqartuussivimmi suliaq eqqartuussiveqarfimmi Nunatta Eqqartuussisuuneqarfianilu suliami Lars-Emil Johansenip Lars Møller-Sørensenimit siunnersortitut atorfinitsinneqarnermi kingunerisaanik ukiut marluk ingerlanerini 730.000 koruuninik akissarsissutigisamini ilumut siunnersortitut suliaqarsimanersoq qitiuvoq.

Unnerluussisussaatitaasup naggasiutigalugu oqaaseqarnermini uppernarsaatissat amigaataanerat pingaartuutippaa:

- Lars-Emil Johansenip siunnersortitut akunnerit 440-t suliaqarsimanera ilumooruni uppernarsaatissiinngiivissimavoq. Ninja-lluunniit taama pitsaatigisumik suliaqarsinnaanngillat, taanna oqarpoq.

Allakkatigut uppernarsaateqarnissaq piumasaqaataanngitsoq

Unnerluutigineqartut marluk illersuisui suliamut oqaaseqarnissamut periarfissaqarneranni allatut tamanna nipeqarpoq, taakku pinngitsuutinneqarnissaat piumasaraat.

- Suliaqartoqarsimanera uppernarsaasussaanermi takutinneqarpoq, taamaammat Lars-Emil Johansen pinngitsuutinneqassaaq, eqqartuussissuserisoq, Anders K- Németh oqarpoq.

Eqqartuussissuserisummi oqarnera naapertorlugu Lars-Emil Johansenip kommunimut siunnersortitut suliaqarsimaneranit Lars Møller-Sørensenillu siunnersortimik pisariaqartitsisimaneranit annertunerusumik pissutissaqanngilaq.

Lars Møller-Sørensenip eqqartuussissuserisuata, Julie Stagep naggasiutigalugu oqaaseqarnermini tamanna aamma oqaatigaa.

- Lars Møller-Sørensenip politikkikkut siunnersorneqarnissani kissaatigisimavaa, taamaammallu isumaqatigiissuteqartoqarluni.

- Kalaallit Nunaanni Lars-Emil Johansenimit politikkikkut aaqqissuussinermut tunngatillugu misilittagaqarnerusunik eqqarsaatiginnissallunga ajornakusoortippara.

Eqqartuussivimmi suliap ingerlanerani arlaleriarlugu allaaserineqartutulli uppernarsaateqarnissaq sammineqangaatsiarpoq. Julie Stagellu tamanna aamma oqaaseqarfigaa.

- Allakkatigut nalunaaruteqarnissaq piumasaqaataanngilaq, nalunaarutiginnittarnerlu oqaluinnarnikkut ingerlanneqarsimalluni, taanna oqarpoq.

Nunatta Eqqartuussisuuneqarfiata illersuisut eqqartuussissuserisut piumasaat malillugu angutit marluk Eqqartuussisoqarfik Sermersuumit eqqartuunneqarsimagaluartut pinngitsuutippai.