TUNULIAQUTSIINEQ Hardenberg pillugu
Svend Hardenberg Nukissiorfinni pisortaanertut atorfeqarnermi kingorna Qaasuitsup Kommuniani kommunaldirektøritut marsip aallaqqaataani 2013-imi atorfinitsinneqarpoq.
Tassanili atorfeqarnera sivisunngilaq, qaammatimmi marluinnaat sulereersoq nalunaarutigineqarpoq Naalakkersuisut siulittaasuata naalakkersuisoqarfiani ukioq taanna juulip aallaqqaataanit atuutilersumik pisortatut Aleqa Hammondikkunnit toqqarneqartoq.
Atorfinitsitsiniarneq assortuussutaasoq
Svend Hardenberg naalakkersuisoqarfimmi pisortaanertut atorfineqqammerluni Carsten Frank Hansenip Aningaasaqarnermut Nunamullu namminermut naalakkersuisoqarfimmi pisortatut atorfinitsinneqarnissaa kaammattuutigaa. Kinguninngua paasinarsivoq, Carsten Frank Hansen sulisitsisorisimasaminut Danske Andelskassers Bankimut peqquserlussimasutut unnerluutigineqarsimasoq pineqartorlu ulluni marluinnarni atorfeqareerluni atorfimminit soraarsitaavoq. Soraarsitsinernut allanut marlunnut ilanngullugu unnerluutigineqarsianera atorfinitsitsiniarnermi paasineqarsimasariaqaraluarpoq, Svend Hardenbergillu knr.gl-imut taamani oqaatigaa Carsten Frank Hansenip tunuliaqutaa pillugu paasiniaasoqarsimasoq, kingornali tamanna pisimanngitsoq oqaatigaa.
Nukissiorfinni atuivallaarneq
Nukissiorfinni pisortaanertut atorfimminit soraarneranut tunngatillugu KNR-ip aviisillu AG-p allagaatinik takunninnissamik noqqaassuteqarnerisa suliarineqarneranut Svend Hardenbergip Namminersorlutik Oqartussani qullersatut atorfimminik atornerluisimanera 2014-ip aallartinnera qulaajarneqarpoq.
Kukkunersiusut nalunaarusiaanni allassimavoq, Hardenberg oqarasuaammik internettimillu akeqanngitsumik atuisinnaanerminik isumaqatigiissuteqarsimanini atornerlussimagaa, 2010/2011-mi oqarasuaammik atuinermut 54.035 koruunit internettimillu atuinermut 11.000 koruunik missaannik atuisimalluni. Tamannalu ataatsimut isigalugu qaammammut 11.000 koruuninik akissarsiaqarnerulissutigaa. Tamatuma saniatigut Svend Hardenberg allallu, suliffeqarfiup biiliutaanik atuisimapput, naak taamaalioqqusaanatik, Nukissiorfiillu kukkunersiuisarfiup Deloittep qulaajaanera naapertorlugu 20 millionit koruuninik atuivallaarsimalluni. Svend Hardenberg tamatuma kingorna atorfimminit soraarsitaavoq.
Hammondip atornerluisimanera
Naalakkersuisut siulittaasorisimasaata Aleqa Hammondip nunatta karsianik atornerluisimaneranut atatillugu siorna oktobarip qaammataani aamma saqqummiunneqarpoq, Svend Hardenbergip atornerluisoqarsimanera ilisimaarisimagaa Naalakkersuisullu siulittaasuata naalakkersuisoqarfiata Hammondip akiitsoqarnera toqqorterniarlugu immikkut kontumik pilersitsisimasoq akiliisitsiniarnissamik suliap aallartinneqannginnissaa anguniarlugu.
Nick Nielsenimut e-mailernera
Doris Jakobsen (S) peqqissutsimut naalakkersuisutut ivertinneqaraluarluni ullut 14-it matuma siorna Folketingimut uterpoq, Nick Nielsenilu Folketingimi ilaasortaajunnaarluni.
Tamatumunnga atatillugu aviisi AG allaaserisaqarpoq, Svend Hardenberg namminerisaminik e-mailiminit Nick Nielsen allaffigisimagaa Pituffimmi sakkutooqarfimmi kiffartuussinissamik isumaqatigiissut annaaneqartoq pillugu Siumup danskillu nunanut allanut tunngasunut ministereqarfiata suleqatigiissimanerat pillugu Nick Nielsen oqaatigisaminut
"danskit naalakkersuisuisa qanittumik suleqatigiissimanerannik" naqqiissuteqassasoq.
E-mailerutigisaata oqaasertai Naalakkersuisut siulittaasuata Kim Kielsenip kingorna ilalerpai.
Svend Hardenbergili marlunngormat "naalakkersuisoqarfimmi pisortatut atorfimminit tunuartinneqarallarpoq".
