Hardenbergip oqarasuaatinut internetimullu 132.000 koruunit atorsimavai

Kukkunersiuisut Deloittemeersut Nukissiorfiit 2010-mut ukiumoortumik naatsorsuutaannik kukkunersiuinerminni allagaq Namminersorlutik Oqartussanut soqutiginartupilussuartut isigisaat Radioaviisip allagaatinik takunninnissamik piumasaqaateqarnermigut pissarsiaraa.

Allakkami ilaatigut atuarneqarsinnaavoq pisortap suliffeqarfimmit biileqartitaajunnaarluni taarsiutitut qaammammut 3.000 koruuninik pissarsisalissasoq.

Svend Hardenberg maajip aallaqqaataa 2010 aallarnerfigalugu aningaasat taakku pisartagarilerpai. Taamaakkaluartorli suliffeqarfiup biilianik atuiinnarpoq. Februaarillu 25-iani 2011-mi allagaq suliarineqarmat biili suli atugarivaa.

Allakkami aamma atuarneqarsinnaavoq Svend Hardenberg akeqanngitsumik oqarasuaateqartinneqarlunilu interneteqartinneqartoq. Tamannalu atorluavissortarsimavaa. Oqarasuaammummi akiligassaq 54.035 koruuninik aningaasartaqarpoq, internetimullu akiligassaq 78.449 koruuninik aningaasartaqarluni.

Svend Hardenberg katillugit 132.484 koruunit nalinginut internetimik oqarasuaammillu atuisimavoq. Agguaqatigiissillugu qaammammut 11.000 koruunit.

Radioaviisip Svend Hardenberg oqaaseqartinniaraluaramiuk iluatsissinnaasimanngilaa.

Paasissutissat tamakku ilaat Radioaviisimit pissarsiarineqannginnerini saqqummereersimapput, aviisillu marluussagunartut allagaatinik takunninnissamik piumasaqarnerminnut aamma akissutissarsisimapput.

Svend Hardenbergimmi Sermitsiaq/AG-p pisortaa Poul Krarup attavigisimavaa paasissutissat tamaasa saqqummiunniarlugit, tusagassiortunit ajortussarsiorfiginiarsarineqarnini pissutiginerarlugu.

Allaaserisami aamma atuarneqarsinnaavoq Svend Hardenberg politikkikkut pilliutigineqarsimasoq, taamani Naalakkersuisoqarfimmut pisortaasup Steffen Ulrich-Lyngep aamma Attaveqarnermut ineqarnermullu naalakkersuisuusimasup Jens B. Frederiksenip Svend Hardenberg akerlerisimallugu. 

Svend Hardenberg isornartorsiorneqarluni allaaserineqarnissani sioqqullugu aatsaat Poul Krarupimut attaveqalinngilaq.

Kingullermik tamanna pivoq juunip ulluisa 14-ianni, taamani Berlingskep Svend Hardenberg ilisimatippaa Svend Hardenbergip soqutigisanik aporaatsitsinera ileqqorissaarnissamullu naleqqutinngitsumik inissisimanera pillugu allaaserisaqarniarluni.

Svend Hardenbergip tamanna paasigamiuk Poul Krarup ornipallappaa, taannalu allaaserisaqarpoq qulequtserlugu "Svend Hardenbergip tamaasa nassuerutigai".