Pisortat atorfinitsinneqartarnerannut oqaluttuat nutaat saqqummiunneqarput

Aningaasaqarnermut Nunamullu Namminermut Qullersaqarfimmi pisortatut atorfinitsinneqaraluartoq, Carsten Frank Hansen, suliffigisimasamini aningaaserivimmi, aningaasanik perulluliorsimasoq, Berlingske-p allaaserisaqareernerata kinguneranik taanna aningaaserivimmit soraarsitaavoq.

Tassalu tamatuma kingorna ilisimaneqartutut, Carsten Frank Hansen Namminersorlutik Oqartussani atorfinitsinneqaraluarpoq, aviisip Berlingske-p tamatumunnga ilisimanittutut oqaloqatigisaannit taaneqarluni, Carsten Frank Hansen politikki atorlugu atorfinitsinneqarsimasutut.

Carsten Frank Hansen Nuummi inunngortuuvoq peroriartorlunilu. Berlingske-llu oqaloqatigisaanit, aterminnik isertorusuttut oqaluttuaraat, Inatsisartut Siulittaasuat, Lars Emil Johansen aamma Naalakkersuisut Siulittaasuata Qullersaqarfiani pisortaq, Svend Hardenberg kammalaatigilluarai.

Berlingske-p oqaloqatigisaasa aamma oqaluttuaraat, Siumumi politikerit pingaarutillit, atorfinitsitsinermut ataatsimiisitaliamut piusaqarsimasut, Carsten Frank Hansen toqqarneqassasoq. Tassalu taanna atrofimmut qinnuteqartunit arfineq marluusunit toqqarneqarluni atorfinitsinneqaraluarluni.

Aamma Svend Hardenbergimit atorfinitsitsineq pissusissamisut ingerlanneqarsimanngitsoq, aviisip oqaloqatigisaannit oqaluttuarineqarpoq. Taakku oqaaluttuaraat, Svend Hardenberg Aleqa Hammondip qinnuteqaqqusimagaa. Naalakkersuisut Siulittaasuata Qullersaqarfianut qinnuteqaraluartut sisamaasiamapput. Quinnuteqarnissamullu ulluliussaq qaangiummat, atorfinitsitsinissamut ataatsimiisitaliap, Svend Hardenberg toqqarnagu allat marluk innersuussimagaluarpaat atorfimmut piukkunnarnerit.

Naak taama ataatsimiititaliaq innersuussigaluartoq, Naalakkersuisut peqqusisimapput, Svend Hardenberg atorfimmut innersuussutigineqassasoq, taannami Aleqa Hammondip pisortatut piumasimammagu.

Naalakkersuisut akuliunneri kusanaagalugu, atorfimmut qinnuteqartut ilaat marluk qinnuteqarnertik atorunnaarsippaat.

Atorfinitsitsinermut ataatsimiisitaliami ilaasortat ilaasa marluusut, Svend Hardenberg innersuussutigigaat, ilaasortaq ataaseq tamatumunnga siumaqataanani nalunaarpoq, ilaasortat sisamaata piumasarigaa, atorfik inuttassarsiuuteqqinneqartariaqartoq.

Kisianni tassa tamanna malinneqanngilaq, ilisimaneqartutullu Svend Hardenberg atorfinitsinneqarpoq juulip aallaqqaataanit.'

Aviisip Berlingske-p oqaloqatigisaat kinaanerminnik isertuusserusussimapput.

- Aviisimi atera ilanngunneqarsimassuuppat tamanna soraarsitaanermik kinguneqarsinnaasoq naatsorsuutigigakku atera isertuukkusuppara, oqaloqatigisat ilaat ataaseq aviisimut oqarpoq.

Alla ima oqarpoq.

- Soorlu kissaviarsuk qupaloraarsunnik piniarnerata nalaani qupaloraarsuit ersillutik nuna qappiaannarlugu timmisut.

Nunatsinni Eqqartuussiveqarneq pillugu ataatsimiisitaliarsuup siulittaasorisimasaa aamma Nunarput pillugu ilisimatusarsimasoq, Finn Breinholt Larsen oqarpoq, Naalakkersuisunngortut pisortanut apeqqutinut akuleruttussaannginnertik suusupagisutut isigimmassuk tamanna tupinnartuusoq.

- Politikkikkut anguniakkanut pisortassaq isumaqataasoq ilisimagaanni taannalu atorfinitsillugu, taava naatsorsuutigineqarsinnaavoq pisortap siunnersuineri sukumiisuusinnaanngitsut, tassami pisunut apeqqusiinngikkaanni politikerit isumaat malinneqaannassapput, Finn Breinholt Larsen aviisimut Berlingske-mut oqarpoq.