Hardenberg: Periaaserineqartut naluakka
Naalakkersuisut siulittaasorisimasaat akiitsoqalersimasoq, akiligassallu matussuserneqartariaqarsimaneri siulittaasut naalakkersuisoqarfiani pisortaq nassuiaavoq.
- Namminersorlutik Oqartussanut akiitsoqaraanni akilerneqarnissai piumasarineqartarpoq. Arlaannilli pissuteqarluni tamakkiisumik akiliisinnaanngikkaanni naafferartumik akersuinissaq periarfissaasarpoq. Tassami Namminersorlutik Oqartussat pisussaaffeqarput akiligassat matussuserneqarnisaat sulissutigissallugu, tamanna Aqutsisoqarfik oqaloqatigineratigut paasivara. Attuumassuteqartut tamarmik akiligassat matussuserneqarnissaat soqutigisaraat, Svend Hardenberg KNRimut nassuiaavoq.
Aamma atuaruk Allaffissornikkut unioqqutitsisoqartoq
Naalakkersuisut siulittaasorisimasaata taarsigassai naalakkersuisoqarfiup iluani kontoliornikkut akilerallarneqarput erniaqanngitsumillu akilersugassanngortinneqarlutik. Tamannalu Allaborg Universitetimi inatsisilerituut immikkoortortoqarfiani lektorimit unioqqutitsinertut nalilerneqarpoq.
- Pisoq tusaannarlugu nalilissagukku unioqqutitsinertut nalilissavara. Pisortaqarfik aningaaserivittut sulisunut politikkerinulluunniit pissusilersorsinnaanngilaq, pisortat tamanna suliassarinngilaat, Sten Bønsing KNRimut taama naliliivoq.
Akisussaanerpaaq akisussaannginnerartoq
Siulittaasup naalakkersuisoqarfiani pisortap Svend Hardenbergip oqaatigisinnaanngilaa sooq Nunatta karsia aningaaserivittut atorneqarsimanersoq, oqaatigaluguli nammineq isumassarsiarinagu isumassarsiarlu taanna allaminngaanneersuunerarlugu.
- Naluara. Taanna oqaaseqarfigisinnaanngilara, periaaserineqartut nalugakkit. Nalunngiinnarpara Namminersorlutik Oqartussat Aqutsisoqarfianeersuusoq, aamma aatsaat taamaliorunanngillat, taama paasivara. Uanga avataaniit malinnaavunga, Svend Hardenberg, Namminersorlutik Oqartussani allaffissornikkut akisussaanerpaaq, oqarpoq.
Aningaaserivittut Nunatta karsia atortinneqarsimanera allaffissornikkut unioqqutitsineruppat pisoq atorfilittanut kinguneqartinneqarsinnaasoq Sten Bønsing oqarpoq.
- Unioqutsitsisoqarsimaneranik naliliinera eqqortuuppat taava kiffartuussinikkut kukkuluttortoqarsimassaaq, taamaappallu pisortani atorfillit piginnaasaat apeqquserneqarsinnaapput sulisitsisullu tamanna iliuuseqarfigisinnaavaa, Sten Bønsing nassuiaavoq.
