Hardenberg Carsten Frank Hansenimik innersuussisuuvoq

Aviisi Berlingske Business allagaatinik nutaanik ullumi saqqummiussaqarpoq, taakkulu takutippaat sulisussarsiortitsisarfik Ramsdal, Vittus Qujaukitsup naalakkersuisoqarfiani pisortassarsiornissamik suliakkerneqarsimasoq, Carsten Frank Hansen atorfimmut piukkunnarnersoq misissueqqullugu Aleqa Hammondip naalakkersuisoqarfiani pisortamit Svend Hardenbergimit toqqaannartumik kajumissaarneqarsimasoq.
Allattoq Karsten Sommer, Simon Uldum
oktobarip 03-at 2013 07:07

- Carsten Frank Hansenip naalakkersuisoqarfimmi pisortatut atorfimmut piukkussatut attavigeqqullugu Svend Hardenbergip toqqaannartumik kajumissaarpaanga, tamannalu tunngavigalugu Carsten Frank Hansen atorfimmut qinnuteqarpoq, Karl-Erik Nielsen, Ramsdal Executive Servicemi pisortaq Berlingske Businessimut oqarpoq.

E-maili Hardenbergip Ramsdalimut nassiussimasaa qulequteqartoq »Aningaasaqarnermut naalakkersuisoqarfimmi pisortatut atorfimmut piukkussat« aviisip pissarsiarisimavaa, Hardenbergili ilaatigut ima allappoq:

- Tusarpara Carsten Frank Hansen atorfimmut soqutiginnittoq. Aamma allappoq taanna Nunatsinnut uteqqikkusuttoq, piukkussamilu mobiilinut marlunnut normut Karl-Erik Nielsenimut tunniullugit.

Aamma allaqqavoq maanna naalakkersuisuutitaqartuni politikerit marluk Carsten Frank Hansen pitsaasutut oqaatigisimagaat.

Carsten Frank Hansenip kajumissaarineratigut Ramsdal ilaatigut Peqqinnissamut Attaveqaatinullu naalakkersuisumit Steen Lyngemit Inatsisartullu siulittaasuanit Lars Emil Johansenimit oqaaseqaatinik piniarsimavoq. Aamma Carsten Frank Hansenip Andelskassen Fynimi pisortarisimasaanit marlunnit oqaaseqaatinik piniartoqarpoq.

- Tamarmik paasissutissiissutigaat Carsten Frank Hansen atorfimmut piukkunnartuusoq, Karl-Erik Nielsen Berlingske Businessimut oqarpoq.

Transparency International Greenlandip siulittaasuata, Anders Meilvangip, Atorfinitsitsinerup ingerlanneqarsimanera ajornartorsiutitaqartutut toqqissisimananngitsutullu isigaa.

- Svend Hardenberg inummik  piginnaasumik innersuussisimasuuppat ajornartorsiutitaqarsimassanngikkaluarpoq. Inuulli taassumi piginnaasai tassaappata Siumukkormiunik nalunngisaqarnera partiimullu atassuteqarnera, taava Hardenbergip sulisussarsiortitsisarfimmut taassuminnga immikkut misissueqqullugu saaffiginnissimanera soorunami pissusissamisuunngilaq, Anders Meilvang oqarpoq.

Carsten Frank Hansen naluneqanngitsutut atorfinitsinneqarpoq, peqquserluuteqarsimasutulli politiinit unnerluutigineqarsimanerminik isertuussisimanera paasineqarmat ullut marluinnaat sulereerluni atorfittaani qimattariaqarsimavaa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk