Ole Rud: Atera Greentopillu aqqa atornerlunneqarput
Atorfinitsitsiniarnermut ataatsimiititaliap siulittaasua Svend Hardenbergip atorfinitsitsiniarneq ullaap tungaani oqaluttuaraa.
- Aningaaserivimmit oqaaseqaatit aaneqarsimapput, kingullermillu suliffigisimasaani paasissutissat Greentop Greenlandimit aamma aaneqarsimallutik, Svend Hardenberg ilaatigut oqarpoq.
Greentop Greenlandilli maanna oqaatigaa saaffigineqarsimanatik.
- Atorfinitsitsiniarnermi ataatsimiititaliaq Greentop Greenlandimut saaffiginnissuteqarsimanngilaq, taamaattoqarsimaneranillu oqarneq taamaammat eqqunngilaq, Ole Rud, Greentop Greenlandimi siulittaasoq Radioaviisimut oqarpoq.
Ole Rudip taama oqarnera, Naalakkersuisut siulittaasuata Naalakkersuisoqarfiani pisortamik Svend Hardenbergimik innarliisinnaavoq, tassami taanna KNR-imut siusinnerusukkut oqaatigimmagu atorfinitsitsiniarnermut ataatsimiititaliaq, Carsten Frank Hansenimik atorfinitsitsinissamik aalajangiisoq, siusinnerusukkut atorfigisimasaanut saaffiginnissimasoq. Svend Hardenberg ataatsimiititaliami tassani siulittaasuuvoq.
Carsten Frank Hansenip sulisitsisorisimasaasa ilaat maanna oqaatigaat Naalakkersuisut siulittaasuata Naalakkersuisoqarfiani pisortaq salluliortoq:
- Atorfinitsitsinernut atatillugu siunnersuisartunit, Naalakkersuisunilluunniit saaffigineqarnikuunngisaannarpugut, Greentop Greenlandimik piginneqataasoq siulittaasorlu Ole Rud oqarpoq.
Carsten Frank Hansenip Greentop Greenlandimi angusarisimasai pillugit paasissutissat, Svend Hardenbergip Ole Rudimit pissarsiarisimanavianngilai
Carsten Frank Hansenip tatiginassusia naqissuserniarlugu, Greentop Greenlandip aqqa atorneqarpoq, naak Hardenberg allaluunniit tassunga sianersimanngikkaluartoq.
Ole Rud aamma isumaqarpoq, aningaasaqarnermut nalakkersuisoqarfimmi pisortaq taamaateriataartoq politiiinillu pasineqartoq atorfigileraluakkaminut naleqqutinngivissioq.
- Maluginiarpara inuit ilaat pisuujumanatik atiga Greentopilu atorlugu allanik pisuutitsiniarsarisut, naak suliami matumani ilaanngilluinnaraluarlunga. Carsten Frank Hansenip Naalakkersuisoqarfimmi pisortatut qinnuteqarsimaneranik ilisimatinneqarnikuunngilanga, ilisimatinneqarsimasuugaluarumali akerliungaatsiassagaluarpunga, tassami isumaqarama atorfigileraluakkaminut naleqqutinngivissoq, Ole Rud oqarpoq.
Svend Hardenbergili ataasiarluni sianersimanerarpaa:
- Carsten Frank Hansen oqaloqatiginiarlugu sianeraluarpoq, oqarfigaarali Carsten Frank Hansen Greentop Greenlandimi suliunnaareersimasoq, Ole Rud oqarpoq.
Naalakkersuisut siulittaasuata Aleqa Hammondip Naalakkersuisoqarfiani pisortap Svend Hardenbergip Ole Rudip oqaasiinut atatillugu oqaatigaa Carsten Frank Hansenip atorfinitsinniarneqarnerani periutsinik ilaatigut uniuisoqarsimasoq.
Greentop Greenlandilli Carsten Frank Hansenimut oqaaseqaataanik aallertoqarsimanngitsoq, Svend Hardenbergip maanna erseqqissaassutigaa.
Carsten Frank Hansen Danske Andelskassers Bankimi aamma sulinikuuvoq, tassanngaanniilli soraarsitaasimalluni. Bankip pisortaa Jan Pedersen Radioaviisimut ullaap tungaa oqarpoq suliamut oqaaseqaqqissunnani.
