Nickip Naalakkersuisunik tikkuartuisimanini soraarsitaassutigigaa
- Massakkorpiaq pisariaqarluinnaqqissaarpoq ataatsimoornissaq, pituffimmut tunngatillugit suliat aamma ilisimaarilluarnissaat folketingemi qanoq suleriaaseqartoqarnersoq, qanoq tappavani ingerlatsisoqartarnersoq. Taannalu najoqqutaralugu suliamut atatillugu saqqummiussassat pillugit pisut takutippaat suliaq taanna kivinneqarsinnaasimanngitsoq, taamaammat kissaatigisimavara kaammattorlugulu Dorisi (red.Jakobsen) tappavunga uteqqikkallassasoq, taama oqarpoq Naalakkersuisut siulittasuat Kim Kielsen.
Taassuma oqaatigaa, pituffik pillugu apeqquteqaammut tunngasumut oqallinnermi Nick Nielsenip naalakkersuisut pillugit oqaaseqaataa pisumut tunngaviusoq.
AAMMA ATUARUK Nick Nielsenip soraarsitaanini paasiuminaatsippaa
- Naqqiissummik januaarip 21.-ninngaanngiik piumasaqaateqarpugut taannalu tigunikuunnginnatsigu.
- Suna tassani naqqinneqassagami?
- Tassani oqallinnermi ersarissumik oqariartuutigineqarpoq naalakkersuisut suliamut tunngatillugu ilisimasaqartut, taannalu ilumuunngilaq, taamaattoq aalajangerpugut, tassa, Kim Kielsen oqarpoq.
Folketingip ataatsimiittarfiani Dansk Folkepartiimeersoq Søren Espersenip apeqqutigaa, Siumup naalakkersuisuutitaasa pituffimmut isumaqatigiinniarnernut tamanut ilaasimanersut.
- Ilimageqqissaarpara, uani suliami kalaallit nunaanni Naalakkersuisut danskit naalakkersuisui qanimut oqaloqatigisimagaat, tamanna qulakkeerlugu oqaatigisinnaavara, Nick Nielsen oqarpoq.
Kingunnngualu oqaatigeqqippaa, isumaqarluni Naalakkersuisut isumaqatigiinniarnernut tamanut ilaasimasut.
- Paasissutissinneqarnikka malillugit, danskit naalakkersuisuilu qanimut suleqatigiillutik qanimut attuumassuteqarsimapput.
Oqaatigineqartulli taakku Kim Kielsenip qisuariaateqarnissaanut tunngaviusimapput.
- Nickilu akornatsinni suleqatigiissinnaanngiinneq pineqanngilaq, kisianni uani tatigeqatigiissinnaaneq taanna pineqarpoq tassani, Naalakkersuisut Siulittaasuat Siumumeersoq Kim Kielsen KNR-mut taama oqarpoq.
