Nick Nielsenip soraarsitaanini paasiuminaatsippaa

Nick Nielsenip Siumut sinnerlugu Folketingimut ilaasortaanernerminit ippassaq soraarsitaanini paasiuminaatsippaa, soraarsitaaneratigut Doris Jakobsen Naalakkersuisunit sulinngiffeqarluni Folketingimi ilaasortaaqqilissaaq.
Nick Nielsen på talerstolen i Folketinget Assi © : Simon Uldum/KNR
februaarip 11-at 2015 11:14
Nutserisoq Simon Uldum -

Danskit kalaallillu ingerlatseqatigiiffiata Greenland Contractorsip Pituffimmi sakkutooqarfimmi kiffartuussinissamik isumaqatigiissummik annaasaqarneranut suliamik ingerlatsisimanera pissutigalugu Siumup siulersuisuunerinit soraarsitaasimanissaa ilaatigut ilimatsaanneqarpoq.

Kiffartuussinissamik isumaqatigiissut pillugu Danmarkip, Kalaallit Nunaata USA-llu akornanni isumaqatigiissutit atuuttut atortiinnarneqarneqarnissaannut Naalakkersuisut siuliisa sulissuteqarnerusimannginnerat ilaatigut isornartorsiuisimasoq tikkuarneqarpoq. Suliap ingerlanneqarnera aamma partiimit illuatungiliuttup IA arlaannaanulluunniit attuumanngitsumik misissuiffeqarnissaa piumasaqaatigineqarsimavoq.

AAMMA ATUARUK Doris Jakobsen Folketingimut uteqqippoq

Siumup siulittaasuata Naalakkersuisunullu siulittaasup Kim Kielsenip ippassaq allakkatigut naatsumik nalunaaruteqarluni allappoq Nick Nielsenip Siumut sinnerlugu aammalu Kalaallit Nunaat sinnerlugu Folketingimut sassarnini naammassisinnaasimanngikkaa.

- Pingaartumik Pituffimmut tunngatillugu suliap takutippaa misilittagalimmik Naalakkersuisunillu suleqateqarsinnaasumik Folketingimi ilaasortaqarnissaq pingaaruteqartoq, Kim Kielsen KNR-mut taama oqarpoq.

Pisoq paasiuminaatsikkaa
Nick Nielsenip oqarasuaatini ullumikkut tigunngilaa, Siumumiilli soraaqquneqarluni allakkiap assilinera Facebookimi quppernerminut ikkussimavaa. Pisoq Folketingimut ilaasortaajunnaassutigisani paasiuminaatsillugu ilaatigut aamma allappoq.


- Inuppaalussuit allaffingivaannga aperillutik - susoqartoruna? Ataanut ilannguppara ullumi siumut allaffianiit allagarsiara. Allamik ilisimasaqanngilanga, aamma Folktingemut ilaasortaajunnaarnissaara  pillugu  ataatsimeeqataanngilanga, taamaattumik ilisimasaqarpallaanngilanga apeqqutillu akisinnaavallaarnagit, Nick Nielsen allappoq.

AAMMA ATUARUK Doris: Folketingimut uteqqinnissannik Kimip kissaataa tusaatissatut tiguara

Siumup taamatut aalajangerneratigut Doris Jakobsen Folketingimut qinersisoqarnissaata tungaanut ilaasortanngoqqissaaq. Kingusinnerpaamik ukiormanna septembarip 14-iani Folketingimut qinersisoqassaaq. Naalakkersuisutut suliassaqarfii  Martha Lund Olsenip Vittus Qujaukitsullu akornanni agguataarneqarput.