Danskit amerlavallaat nunatsinnut takornariartarput. Maannakkummi takornariat tallimaagaangata sisamat Danmarkimeertarput, taamaammat allaneersut pilerisaarneqarnerusariaqarput. Tyskit, tuluit, jaapanimiut amerikamiullu sermersuatta takunissaanut, qimussernernut qaqqatsinnilu pisuttuartarnissaannik pilerisaarnerusariaqarput.
-Ukiut sisamat tallimat ingerlanerini siunniuttariaqalerparput takornariat danskiusut affaannanngortillugit nunanit allanit tikeraartoqartalernissarput; nunamiimmi ataasiinnarmiit tikittoqartartilluta aningaasarsiornikkut nangiarnartorsiortuassaagut.
Tyskit, tuluit, jaapanimiut amerikamiullu aningaasaateqarluarput nunanut tikisaminni atorluarusuttakkaminnik, Grønlands Turist & Erhvervsråd-imeersoq – takornariartitsinermi suliffeqarfinnullu siunnersortit pisortaat Stig Rømer Winther nassuiaavoq.
Siornaak takornariat 31.500-t missingi nunatsinnut takornariarput – ukiumilu 2010-mi 50.000-nngornissaat anguniarneqartoq, Stig Rømer Winther oqarpoq – siunertarinerarpaalu danskit takornariat affaannanngortinnissaat.
Takornariat akiliisinneqartarnissaat nalilersuiffigineqarpoq, aasaanerani ukiuuneranilu akit assigiinngittariaqarnerat nalimmassarneqassaaq – tassami unammillertivut Island-imiut taamaaliortarput.
-Island-imiummi takornariaasattoqartillugu akinik apparsaasarnerat unamminartuuvoq. Naallu timmisartunut ilaanernut akit apparsinnaanngikkaluit, takornariartitsisartut – angallatinik ingerlassisut, qimussersullu akigititaminnik naleqqussaasariaqartut, Stig Rømer Winther nalilersuivoq.
Takornariaasattoqartillugumi ilaqutariit takusassarsiorlutik angalassagunik 1.000-inik arlalinnik akiliissappata ingasangajattoq, Stig Rømer Winther naggasiivoq.