URANI Danskit partiivi: Uranimut inatsit piiaasoqarnissaanut akuersinerunngilaq
Marlunngornermi inatsisit uranimut tunngasut siullermeerneqanngitsiarnerini Folketingimi partiini angisuuneersut marluk taama oqaaseqarput.
Socialdemokratit inatsisissatut siunnersuutinut isumaqataapput - uani Nunarput pillugu oqaaseqartartoq Karin Gaardsted apersorneqarpoq.
Uranimik tunisassiassap Kalaallit Nunaat qimappagu sillimaniarneq eqqarsaatigalugu isumannaatsuunissaa soorunami pingaarnerpaasoq taanna oqarpoq. Uranimillu atuisussat ajunngitsumik siunertaqarnissaat qulakkeerneqarsimassasoq.
Aamma atuaruk Nauja Lyngep danskit oqallinnermut ilanngutsikkusuppai
Innuttaasunik taasisitsisoqareerpat
Karin Gaardsted naapertorlugu, siunertanut eqqissisimasunut, ilaatigut peqqinnissaqarfiup iluani teknikkikkut atortorissaarutinut, uranimik pisariaqartitsisoqarpoq.
Uranimik Kalaallit Nunaanneersumik avammut tuniniaanermi isumannaallisaanissamullu inatsisissatut siunnersuutit marluk partiip tapersersorpai.
Aamma naak Inatsisartuni ikinnerussuteqartut amerlasuut Kalaallit Nunaanni uranisiornissaq akerlerigaluaraat.
Piiaanissamullu akerliusut partiit arlallit isumaqaraluartut, inatsisissatut siunnersuutit aatsaat suliarineqartariaqartut Kalaallit Nunaanni innuttaasunik taasititsisoqareerpat.
Aamma atuaruk Demokraatit: Urani pillugu innuttaasunik taasititsisoqassanngilaq
Danskilli partiivisa tamanna akuleruffigisinnaanngikkaat, Karin Gaardsted isumaqarpoq.
- Aallaavigisariaqarpara Kallaallit Nunaanni tamakku oqallisigineqareersimanissaat naatsorsuutigigakku - iternga tikinnagu - nunanulli allanut tunngasunut ministereqarfimmut usumaqatigiissutaasutut ittumik.
Kalaallit namminneq aalajangissavaat
Taanna isumaqarpoq Kalaallit Nunaanni uranimik piiaanissap Danmarkip inatsisissatut siunnersuutit akuerinerisigut aallartinnissaa ammaassiffigissanngikkaa.
- Kalaallinuku namminneq uranititalinnik piiaasinnaaneq aalajangeraat. Danmarkiunngilaq.
Aamma atuaruk Sermitsiaq urani pillugu suleqatigiiliorpoq
- Dansk Folkepartiip uranimik tunisassiorneq tunngaviatigut akerlerinngilaa, isumannaatsumilli ingerlanneqarnissaa siunertanullu eqqissisimasunut atorneqarnissaa kissaatigalugu, Jeppe Jakobsen taama oqarpoq.
Dansk Folkepartiimi inatsisissatut siunnersuutit aamma tapersersorneqarput. Nalunaarusiarli Greenland Minerals and Energymeersoq VVM suli utaqqineqarpoq. Kalaallit Nunaanniit uranimik avammut nioqquteqartoqassanersoq akuersaartinnagu nalunaarusiaq tigoqqaarlugu aalajangertoqarumaartoq, Jeppe Jakobsen oqarpoq.
- Inatsisissat uranimut tunngasut piiaanissamut akuersissutaanngillat. Kingunerisinnaasai naammaginartumik nalilersorneqareerpata aatsaat akuersisoqarsinnaavoq. Kalaallit Nunaanni pinngortitaq allanngujasoq soorunami mianerisariaqarparput, Dansk Folkepartiimeersoq oqarpoq.
Akuerineqarnissaa naatsorsuutigineqarpoq
Naatsorsuutigineqarpoq naalakkersuisut suleqataasalu inatsisissatut siunnersuutit akuerissagaat.
Aamma atuaruk Urani pillugu siunnersuutit politimesterip ernumanartoqartikkai
Siunnersuutinut ersarissumik akerliusutuaapput Enhedslisten. Partii Alternativet uranisiornissamut akerliunerarpoq, marlunngornermili taasisoqanngitsiarnerani eqqartussavaat siunnersuutinut akuersissanerlutik akerliussanerlutilluunniit.
Aamma atuaruk Illoqarfiit pingaarnersaanni uranimut akerliusut amerlapput
