URANI Demokraatit: Urani pillugu innuttaasunik taasititsisoqassanngilaq
Inatsisartut aalajangeereerput aamma taamaasilluni aalajangerneq pereerpoq, Demokraatit tusagassiuuutinut nalunaaruteqarlutik taama allapput.
- Amerlanerussuteqarneq naapertorlugu aalajangersaaviusartumik ingerlatsivugut uagullu politikerit qinerneqartarpugut aalajangiisussanngorluta. Naatsorsuutigineqartariaqarpoq inatsisartuni aalajangerneqartut ullormiit ullormut allanngortinneqarsinnaanngimmata, Demokraatit tusagassiuutinut nalunaaruteqarlutik taama allapput.
Demokraatit aalajangiusimallugu oqarput, Inatsisartuni amerlanerussuteqartut aatsitassanik qinngornernik ulorianartortalinnik qalluinngilluinnarnissamik aalajangersagaq atorunnaarsereermassuk, taamatullu aalajangerneq misissueqqaarnissamut aningaasat millionit koruunit arlaqartut atorneqarmata.
Demokraatit ernumassutigaat, Kalaallit Nunaata nunarsuarmioqatinit isigineqarnera innarlerneqassassoq, uran pillugu innuttaasunik taasisitsisoqassagaluarpat.
