Ilisimatusartoq: Danskit nunasiaateqarnerup nalaa pillugu ilisimasakippallaarput

Danmarkip Kalaallit Nunaannik nunasiaateqarsimanera pillugu danskit ilisimasakippallaarput. Danmarkimi ilisimatusartoq tusagassiortorlu taama isumarpoq.

Taamaammat sorsunnersuup aappaata kingorna pingaartumik Nunatta nunasiaataanermit Danmarkimi amtinngortinneqarnera sammillugu maanna atuakkiorluni aallartissimavoq.
 
- Danskit pissutsinik tamakkuninnga ilisimasaqanngitsut ajoraluartumik amerlavallaarput, ilisimatooq tusagassiortorlu Anne Kirstine Hermann KNR-imut taama oqarpoq.

AAMMA ATUARUK Nunasiaanermi pisunit eqqugaasimasut ilisimatusartup oqaluttuartikkusukkai

Ajunnginnerpaamik siunertaqarluni

Inuiaqatigiit kalaallit Danmark assigalugu nutaalianngortinniarlugit inuit nunaqarfinnit illoqarfinnut pinngitsaalineqarlutik nuutsitaasimanerat meeqqallu misileraatigalugit Danmarkimut aallartitaasarsimanerat innersuussutigaa.

Anne Kirstine Hermannilli tamakku tamaasa ajunnginnerpaamik siunertaqarluni pisimanerinik danskit isumaqarnerat allanngortikkusuppaa.
 
- Taamatut isumaqartoqarnera ilisimatusarnerma allanngortissinnaassagaa neriuutigaara. Pisimasummi ajunngitsuinnaasimanngillat.
 
Taamaammat Anne Kirstine Hermannip kalaallit kinguaariit kingulliit danskisut innuttaasutut ilanngutivinnissamut politikkimik 1945-mit 1960-ikkut nalaanni misigisaqarsimasut attaveqarfigerusuppai.

AAMMA ATUARUK Danmarki utoqqatsissava?

Oqaluttuassalinnik ujartuisoq

Inuit oqaluttuarisaat kingulissatsinnut toqqorneqarnissaat siullertut siunertaraa, tamatumunngalu peqatigitillugu atuakkamik atuartut aamma kalaallit danskit oqaasiinik kulturiannillu danskinngorsagaasimanerinik paasisaqartikkusullugit.
 
- Danmarkimi atuakkamik atuartut danskit qanga Kalaallit Nunaanni qanoq iliortarsimanerinik nunasiaateqarsimanitsinnillu ilisimasaqarnerulernissaat neriuutigaara, ilisimatusartoq atuakkiortorlu Anne Kirstine Hermann KNR-imut taama oqarpoq.

AAMMA ATUARUK Meeqqat pinngitsaalillugit aallartinneqartut utoqqatserfigineqanngillat

Kalaallit meeqqat 1951-imi Danmarkimut aallartitaasimasut danskit naalakkersuisuisa utoqqatserfigerusussimanngilaat.
 
Atuagarlu saqqummereerpaat taamaaliortoqarsinnaassanersoq Anne Kirstine Hermannip isummerfigerusunngilaa.  
 
- Uanga tamanna susassaqarfiginngilara. Ilisimatusartutut tusagassiortutullu paasissutissanik piviusunik saqqummiussiinnarpunga, politikkikkullu qanoq pisoqassanersoq allat isummerfigisassaraat, Anne Kirstine Hermann taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat