Isumalioqatigiissitaq Danmarki utoqqatsissava?
Danmarkimi politikerit arlallit Danmarkip pisortatigoortumik utoqqatsernissaa pissutissaqarsorinngilaat.
Utoqqatserneq suminngaanniissanersoq oqaatigineqanngilaq. Innuttaasulli arlallit isumalioqatigiissitamut oqaatigisimavaat ilaatigut meeraanerminni pinngitsaalisaallutik Danmarkimut atuariartortitaasimanermikkut, pinngitsaalisaallutik nuutsitaasimanermikkut sumilu inunngorsimaneq tunngavigalugu akissaasersuineq pissutigalugu innarligaasimallutik.
Utoqqatsertoqarnissaali pillugu oqallitsitsinissamik inassutigineqartoq Danmarkimi politikerinit arlalinnit immikkut maluginiarneqarsimavoq.
Enhedslistenip Kalaallit Nunaannut tunngasunut oqaaseqartartua Christian Juhl isumaqarpoq utoqqatsertoqarnissaanik pisariaqartitsineq isumaliutissiissummi pingaarnerpaasoq. Inassutigineqartorlu ima paasinerarpaa nunasiaanerup nalaani pisimasut danskit naalagaaffiata utoqqatsissutigisariaqarai.
- Oqaluttuarisaanermi kukkussutaasimasut pillugit naalagaaffik sunaluunniit taamaaliorsinnaasariaqarpoq. Matumanilu kukkussutaasut annertullutillu ilungersunartupilussuusimapput, Christian Juhl oqarpoq
SF-ip Kalaallit Nunaannut tunngasunut oqaaseqartartuata, Karsten Høngep, Christian Juhl tamakkiisuunngikkaluartumik taperserpaa, Utoqqatsertoqarnissaanulli kissaateqarnerup ersarinnerusumik nassuiarneqarnissaa ujartorlugu.
- Sunarpiaq utoqqatsissutigineqassanersoq ersarissumik oqaatigineqartariaqarpoq.
Partiip naalakkersuisuutitaqartup Konservative Folkepartiip Nunatsinnut tunngasunut oqaaseqartartuata Rasmus Jarlovip, danskit oqartussaasuisa Nunatsinni namminersornerulernerup tungaanut iliuuserisimasai pillugit Danmark utoqqatsertariaqarsorinnngilaa.
Nunatsinnili piffissap ingerlanerani danskit tungaannit kukkusoqartarsimanera nassuerutigaa.
Nunanut allanut tunngasunut ministeriusimasup Radikalillu Nunatsinnut tunngasunut maanna oqaaseqartartuata, Martin Lidegaardip, Rasmus Jarlov isumaqatigaa.
Naalakkersuisut siulittaasuata, Kim Kielsenip, inassutigineqartut eqqarsaatigeqqaarumallugit suli oqaaseqarfiginngilai .
