Meeqqat pinngitsaalillugit aallartinneqartut utoqqatserfigineqanngillat
Isumaginninnermut nunamilu namminermi pissutsinut danskit ministeriat Karen Ellemann taama erseqqitsigisumik KNR-imut akissuteqarpoq. Taassuma pisimasoq "Danmarkip Kalaallit Nunaatalu oqaluttuarisaaneranni alianartutut taarusunneruaa."
Meeqqat aallartitaasut suliniaqatigiiffinnit Red Barnetimit Røde Korsimiillu pisortatigoortumik toqqaannartumillu utoqqatserfigineqarnerisa kingorna suliaq sammineqalerpoq.
Aamma atuaruk Kalaallit meerartaannik misileraanermut peqataasimanini Red Barnetip ajuusaarutigalugulu utoqqatsissutigaa
Isumaginninnermut nunamilu namminermi pissutsinut danskit ministeriata Karen Ellemannip taamani aallartitsisimaneq kukkunertut nassuerutigaa. Tamannalu ajuusaarutigiinnarpaa:
- Meeqqanilli taamatut aallartitsisimaneq ullumikkut, Kalaallit Nunaanni Danmarkimilu eqqarsartaaseq malillugu kukkunertut taarusunneruara, namminerlu inuttut assut ajuusaarutigalugu, Karen Ellemann KNR-imut akissuteqarluni allappoq.
Ministeri aamma isumaqarpoq, tamanna Kalaallit Nunaata Danmarkillu oqaluttuarisaanikkut ilinniutigisimassagaat.
- Ajoraluartumik kalaaliaqqat oqaluttuassartaat alianartoq allanngortissinnaanngilarput. Qujanartumilli tamanna ilinniutigaarput, Karen Ellemann, Kalaallit Nunaata Danmarkillu akornanni pissutsit erseqqissaatigalugit akissummini taama allappoq.
- Nunasiaanermi kapitali qaangiutereerpoq, Kalaallit Nunaat namminersorpoq Kalaallit Nunaatalu Danmarkillu akornanni ataqqeqatigiinneq suleqatigiinnerlu ilisarnaataapput, Karen Ellemann allakkamini ilaatigut taama allagaqarpoq.
Aamma atuaruk Danskit naalagaaffiat kalaallit meerartaannut utoqqatsertariaqarpoq
Kalaallit meeqqat misiliutigalugu aallartinneqartut pillugit Lars Løkke Rasmussen siuliani naalakkersuisuni siuttuunerani isiginninnermut allanngortitsinngilaq.
Juliane Henningsenip 2009-mi, taamani Inuit Ataqatigiit sinnerlugit Folketingimi ilaasortaasup, paragraf 20 naapertorlugu kalaallit meeqqat misiliutigalugu aallartinneqartut pillugit apeqquteqaateqarnerani, Lars Løkke Rasmussenip danskit pisortatigoortumik utoqqatsernissaat itigartitsissutigaa.
"Oqaluttuarisaaneq allanngortinneqarsinnaanngilaq. Nunasiaanerup nalaa oqaluttuarisaanitsinni naammassereersutut Naalakkersuisut isigaat. Massakkut piffissaq allaammat tamanna nuannaarutigisariaqarparput, Lars Løkke Rasmussen akissummini taama allappoq.
Aamma atuaruk Saammaateqatigiinnissamut isumalioqatigiissitaq misissuisoqarnissaanik ujartuisoq
