Savalimmiormut folketingimut ilaasortaatitaat: - Danskit inatsisartuini uagut qallunaatut oqaluttarpugut

Ajunngisaarneq kusanartoq ataqqinnittorlu – kisianni Savalimmiunut pingaartuunngilaq.

Savalimmiormiut folketingimut ilaasortaatitai marluk Sjúrður Skaale (Javnaðarflokkurin) aamma Anna Falkenberg (Sambandspartiet) Folketingimi aamma Christiansborgimi politikikkut suleqatigiissiitani kalaallisut aamma savalimmiormiutut oqaluttoqarsinnaalernerata nalunaarutigineqarneranut taama oqarput.

- Tassami Kalaallit Nunaata Danmarkillu akornanni oqaloqatigiittarnerit taanna kinguneraat. Naapigiaalluni ajunngisaaarnertut isigaara, Sjúrður Skaale oqarpoq. 

Kisianni tassunga qinersisaanullu aaljangiineq pingaartuunngilaq.

- Folketingi danskit inatsisartuisut isigaarput aamma  Lagtinget Savalimmiut inatsisartuisut. Danskit inatsisartuini danskisut oqalunnissaq ajornartorsiutiginngilara, aamma savalimmiormiutut oqalunnissaq nutserlugulu piumasaqaatiginianngilara.

Sjúrður Skaale naapertorlugu aamma Folketingimi inatsisinik suliaqarnerup takutippaa tassani politikerit pingaarnerusumik Danmark ukkatarisaraat kunngeqarfiup immikkoortui allat pinnagit.

- 2011-miilli Folketingimi issiavunga, maanilu inatsimmik toqqaannartumik Savalimmiunut atuuttussamik aalajangigaqarnikuunngisaannarpugut.

Savalimmiuni danskit oqaasii unammillernartuunngillat

Savalimmiuni danskit oqaasii nunap pisortatigoortumik oqaasiissa aapparaa, soorlu Kalaallit Nunaanni. Maanngali allaassutigaat savalimmiormiut tamarmik, ataasiakkaat eqqassanngikkaani, danskisut oqaluttarmata. 

Savalaimmiut Lagtingianni aamma nutserisoqarneq ajorpoq, savalimmiutuummit danskisuumut oqaatsilluunniit allat akornanni, Savalimmiuni Lagtingip pisortaa Johnhard Klettheyggj KNR-imut oqarpoq, naak aamma pisortanut tunngasuni danskit oqaasii atorneqarsinnaagaluartut. Kisianni massakkut Lagtingimi politikerit tamarmik savalimmiormiutut paasisarput.

Kisianni kalaallit oqaasii oqaatsinut naggueqarigiinnut danskisuunit savalimmiortuumillu allarujussuupput, taakkumi amerlasuutigut imminnut eqqaanarmata.

Tamannalu Folketingip pisortaqarfiata, Præsidiet-mik taaneqartartup, paasisimarpasippaa. Tassami ilaatigut sapaatip akunnera kingulleq nalunaarutigaat folketingimut ilaasortat Atlantikup Avanaaneersut Folketingimi kalaallisut savalimmiormiutullu oqalussinnaalermata.

Tamanna pisinnaavoq kingornatigut danskisuumut oqalullutik nutsissappassuk imaluunniit oqalutsinnatik oqaaseriniakkatik sioqqullugu allattarsissatigut nutsertissimappatigit.

Tassami Folketingimi danskisuunngitsumik oqalunissaq inerteqqutaanikuunngisaannarpoq.

Kisianni Aki-Matilda Høegh-Damip maajimi Folketingimi kalaallisut oqalunneratigut ukkatarineqalerpoq Kalaallit Nunaanni pisortat ingerlatsineranni politikikkut ingerlatsinermi nutserinermut oqalutseqarnermullu aningaasarpassuit atorneqartarmata.

Kisianni manna tikillugu Folketingimi pissusissamissortutut isigineqarpoq tamarmik dansksut oqaluttut allagartallu uppernarsaatit tamarmik danskisoormata  .

Politikeri: Danskisut oqalunnissaq sapernannginnerpaavoq

Savalimmiuniit Folketingimut ilaasortap Anna Falkenberg-ip Sambandspartiimeersup oqaatsitigut politiki nutaaq aamma tapersersorpaa  .

- Isumaqarpunga ajunngilluinnartoq uagutsinnut folketingimut ilaasortanut Atlantikup Avannaaneersunut pisortatigoortumik sinaakkutissaqaleratta. Taamaattumik isumaqarpunga aalajangiineq pitsaasuullunilu eqqortuusoq.

Kisianni Christiansborgimi sulinermini savalimmiormiutut oqalunnissaminut nutserunneqarnissaminullu periarfissaq atornianngilaa.

- Danskit oqaasiinik atuineq iluaraara sapinngisamillu danskisut oqaloqatigiinneq attatiinnarniarlugu folketingimi ilaasortat inersuarmi issiaqatigisama suleqatigiissitanilu issiaqatigisama danskisut oqaluuttuarnissaat kissaatigaara. Misigisimavungalu tamanna pitsaanerpaamik suliarisinnaallugu danskisut oqalukkuma, Anna Falkenberg oqarpoq. 

Kisianni siunissami savalimmiunit folketingimut ilaasortassanut Christiansborgimi oqaatsiminnik atuisinnaanissaq tunngasinnaasoq mattunnianngilaa.

Tassami ilaasortaaqataa Sjúrður Skaale ilaanneeriarluni Christiansborgimi savalimmiormiutut oqalulaartarpoq, oqaasrisami pikkunartortaa nammineq oqaatsimigut oqaatigissallugu erseqqinnerulissappat.

- Akuerineqanngikkaluarlunga taamaaliortarpunga, aamma imaassinnaavoq siunissami arlaleriarlunga taamaliortunga – massakkut immikkut sivisunerusumik piffissaqartitaallunga.

Kisianni sisamanngorpat tulliani ammaanersiorluni oqallinnermi savalimmiormiutut oqalussanerluni kingornatigullu danskisuumut nammineq nutserlugu suli aalajanginngilaq.

Suppleant for Aki-Matilda Høegh-Damimut Siumumeersumut sinniisussaq  Markus E. Olsen Folketingimi kalaallisut oqalunniarluni arlaleriarluni nalunaareerpoq.