Danmarkimik isumalluuteqaannarnissamut atsioqatigiinneq?
Danmark Nunatsinni aningaasaliinerorusuppoq illuani Savalimmiut Danmarkip tapiissutaanik ikilisaasut.
Nunallu Atlantikup avannaaniittut taakku marluk imminut napatittumik aningaasarsiulernissamik siunissarlu ungasinnerusoq isigalugu namminiilivinnissamik siunnerfeqarlutik.
Naalagaaffiup tapiissutaasa saniatigut Danmark 1,6 milliarder koruuninik Nunatsinnut aningaasaleeqqinniaapoq illuanik Savalimmiunut naalagaaffiup tapiissutai 2026-mi 542 millioner koruuninngortussaasut.
Danmarkillu aningaasaleeqqinnera pivoq qineqqusaarnermi namminiilivinnissaq sammineqangaatsiareersoq.
- Nammineq nunagisaq inerisarniarlugu aningaasanit avataaniit pissarsianik atuissagaanni taava namminiilivinnermut eqqaanartoqarpallaanngilaq, Danmarkimi nunat tamalaat pillugit ilisimatusarfimmi DIIS-mi ilisimatusartoq Ulrik Pram Gad KNR-mut oqarpoq.
Taassuma ilaatigut ilisimatusarfigai naalagaaffeqatigiinnermi allanngoriartorneq aamma kalaallit qallunaallu nunasiaataasimanerup kingorna attaveqatigiinneq.
Aningaasarsiorneq pillugu statsminister Mette Frederiksenip aamma Naalakkersuisut siulittaasuata Jens Frederik Nielsenip isumaqatigiissutaat pillugu nalunaarut atuarpaa. Aningaasat ilaatigut atorneqassapput peqqinnissaqarfimmut kiisalu attaveqaasersuinermut. Aningaasaliineq pivoq EU Nunatsinnut nutaamik tapiissuteqarnissamik nalunaaruteqaqqammisoq.
- Isumaqarpunga Nuummi naalakkersuisoqarfinni Bruxellesimiit aningaasat pissarsiat nuannaarutaasut København isumalluutaannginnerussammat. Kisianni aamma iluassaaq peqqinnissaqarfimmut attaveqaasersuinermullu Københavnimiit aningaasalersuisoqarmat. Aningaasalli taakku qujarunnissaat nangaanarsinnaavoq misiginarsinnaammat isumalluuteqarnerup maannamut ingerlasup nangiinnarnissaanut tamanna aqqutaasinnaammat, Ulrik Pram Gad oqarpoq.
Peqqinnissaqartimmi ingerlatsinermut tapiissut
Danmarkip nutaamik 1,6 milliarder koruuninik aningaasaliissutai ilaatigut atorneqassapput Ittoqqortoormiini suluusalinnut mittarfissamut kiisalu Qaqortumi itisuumik umiarsualivissamut. Danmarkip aningaasaliissutaasa ilai peqqinnissaqarfimmut atorneqassapput.
Aningaasaliissutit takkupput EUp milliardilikkaanik aningaasaliiniarluni nalunaaqqammernerani.
- Aningaasaliinerit Københavnimeersut assigiinngitsuupput. Immikkoortup aappaa tassaaneruvoq tapiissut imaluunniit ajutuulernermi peqqinnissaqarfimmut aningaasaliineq innuttaasut pitsaanerusumik sullikkusullugit ataatsimoortumik tapiissutiniit tamanna akissaqarfigineqanngimmat, Ulrik Pram Gad oqarpoq.
- Immikkoortup aappaa attaveqaasersuutini mittarfissamut umiarsualivissamullu tapiissutaavoq. Tassani oqartoqarsinnaaneruvoq aningaasarsiornikkut siuarsaanissamut aningaasaliisoqartoq, Ulrik Pram Gad oqarpoq.
Aningaasaliinerit annertunerusariaqarput
- Apeqqutaavorli Ittoqqortoormiini mittarfiliorneq Qaqortumilu umiarsualiviliorneq aningaasarsiornikkut siuariaataassanersut soorlu taamatut Ilulissani Nuummilu mittarfissualiornerit isumalluarfigineqartut, Ulrik Pram Gad oqarpoq.
Attaveqaasersuinermulli aningaasaliinerit iluaqutaassanersut maanna suli oqaatigiuminaappoq.
- Taakkunani innuttaasunut pitsaanerusumik sullissisoqalersinnaavoq, tamannali pissutigalugu aningaasarsiorneq siuariaateqassappat suli annertuumik aningaasaliisoqartariaqarpoq tassami inuit tikittarlutillu aallarartariaqarput aammalu nassiussat tikittut nassiunneqartullu ingerlasariaqarput periarfissaalersut atorlugit, Ulrik Pram Gad oqarpoq.
Naalakkersuisut statsministeriaqarfillu nalunaarput isumaqatigiissummi attaveqaasersornermut, inuussutissarsiutitigut inerisaanerlu nukissiuutitigullu pilersuinerup isumannaatsuunissaanut suli aningaasaliisoqarsinnaasoq.
