Jens-Frederik Nielsen: Qallunaat aningaasaliinerat namminiilivinnissamut pitsaanerusumik sinaakkusiivoq
Kalaallit Nunaannut aningaasaliinerit ukiorpassuarni naammaginarnikuunngimmata, Jens-Frederik Nielsen (D) Danmarkimi tikeraareerluni marlunngornermi nuannaarluni Nuummut tikippoq.
Naalakkersuisummi siulittaasuat Danmarkip 1,6 milliarder koruuninik aningaasaliissuteqarnissaanut sinaakkusiisumik 2026-miit 2029-p tungaanoortumik isumaqatigiissuteqarpoq.
- Tassa amerlasuutigut iluaqutaassapput. Ukiorpassuit naammanngitsunik aningaasaliisimaneq nunatsinnut ineriartornissamut sinaakkutit pitsaanngippallarsimasut maannakkut kiisami iliuuseqarfiginiarneqalermata nuannaarutigaara, Jens-Frederik Nielsen oqarpoq.
Aningaasaliissutit milliardit taakku ilaatigut Ittoqqortoormiini mittarfimmut nutaamut Qaqortumilu itisuumi umiarsualivimmut nutaamut atorneqarumaarput.
Tamatuma saniatigut kalaallit Danmarkimi napparsimmavinni peqqissariartortunut aningaasartuutit Danmarkimiit matussuserneqartalerumaarput. Aningaasartuutaasartut 400 million koruunit missaanniittut peqqinnissaqarfimmi unammilligassarpassuarnut aaqqiiviginninnissamut iluaqutaasalernissaat Jens-Frederik Nielsenip neriuutigaa.
- Tassa immaqa ukiorpassuarni pisussaaffiit naammassineqarnikuunngitsut, naammanngitsumik iliuuseqarsimaneq, taanna maannakkut alloriarfigineqarpoq. Aamma isumaqarpunga ukua aningaasaliissutit siulliit saqqummiunneqartut isumaqatigiissummi taakkua annertuumik inuiaqatigiinnut iluaqutaasinnaasut, Jens-Frederik Nielsen oqarpoq.
Namminersulernissamut pitsaanerusumik sinaakkusiineq
Tasiilami illoqarfik nutaamik mittarfittaarnissaa innuttaasut ukiorpassuarni kissaatigisimavaat, nutaamilli isumaqatigiissuteqartoqarmat, Ittoqqortoormiit 300-t sinnilaarlugit innuttaasulik nutaamik mittarfittaarnissartik maanna qilanaarisinnaanngorpaat.
Siulittaasoq naapertorlugu naalakkersuisooqatigiinnissamut isumaqatigiissummi Tasiilaq qinigaaffimmi matumani nutaamik mittarfittaassasoq allaqqanera tassunga peqqutaavoq.
- Ittoqqortoormiit maannakkut aningaasaliiffigineqarnera arlalinnik peqquteqarpoq. Ittoqqortoormiini innuttaasut inuiaqatigiit sinneraniit tikikkuminaannerpaatut ukiorparpassuarni taaneqarsinnaapput immaqa, ungasinnerpaanikuupput taakkua akuutinnerulernissaat ineriartorsinnaanissaanut aamma suliaqarneq pingaaruteqarpoq, taanna oqarpoq.
Ittoqqortoormiini mittarfissaq nutaaq innuttaasunut illersornissamullu atorneqassaaq. Tassa imaappoq marloqiusamik atorneqassaaq. Tamatumunnga pissutaavoq Tunup avannaani tamarmi oqartussaanerup takutinnissaa pisariaqarmat, Jens-Frederik Nielsen Sermitsiamut oqarpoq.
Naalakkersuisut siulittaasuata milliardilikkaanik aningaasaliineq nuannaarutigaa, allalli tamanna Kalaallit Nunaata Danmarkimut qaninnerulersinniarneratut isigisinnaavaat.
Jens-Frederik Nielsen, aningaasaliinerit taakku Danmarkimut pituttornerunngila?
- Taanna pituttornerunngilaq, ullumikkut inatsisit piusut namminersornermi inatsit allallu allannguuteqarnatik una isumaqatigiissut ingerlavoq. Aamma isumaqarpunga namminersornerup eqqunneqarnerani anersaaq tassa nammineernerulernissatsinnut sinaakkutit pitsaanerunissaat taakkua ilaatigut maannakkut alloriarfigineqartut.
Aningaasaliissutit naammappat?
- -Isumaqarpunga alloriarneq siullertut isigineqartariaqartoq. Aamma naalakkersuisuninngaannit soorunami siunniupparput inuiaqatigiit tamarmiusut ineriartortinnissaat tassanilu aamma suleqatigiinneq. Aamma naalagaaffeqatigiinnerup iluani naligiinneruneq. Taanna piviusup eqqartorneqarnerani pingaaruteqarpoq, Jens-Frederik Nielsen oqarpoq.
