Atassut: Danmark nunatta peqqinnissaqarfianik pitsanngorsaanissamut ikiuisariaqarpoq

Atassut nammineq aalajangiisuusinnaasuuguni, Danmark nunatsinni peqqinnissaqarfimmik ingerlatsissagaluarpoq. Tamannali partiinit allanit akerlerineqarpoq.

Taamaammat nunatta peqqinnissaqarfia pillugu Danmarkimik suleqateqarnerunissaq Atassutip qineqqusaarutigaa.

Danmark ilaatigut aningaasaqarnikkut sulisoqarnikkullu tapersiisinnaasoq, partiip siulittaasua Aqqalu Jerimiassen, isumaqarpoq.

- Taassuma iluatungaani naalagaaffeqatitsinnik suleqatiserinninnerunissaq anguniarparput, Aqqalu Jerimiassen oqarpoq.

AAMMA ATUARUK Atassut: Ernisarfeqarfiit matuneqarsimasut ammaqqissapput

Nunatsinnut oqartussaaffinnik Danmarkimit tigusinissaq qineqqusarnermi sammineqarpoq. Oqartussaaffiit tiguneqarnissaat ukkatarineqarnerulertariaqartoq, Siumumit Nunattalu Qitornaanniillu isumaqarput. Suleqatigiissitsisut allamik isumaqarput. Oqartussaaffinnik tigusinata oqartussaaffiit nunatsinnit tiguneqareersut ingerlalluarnissaat ukkatarineqartariaqartoq Suleqatigiissitsisut isumaqarput.

Atassutip Suleqatigiisitsisutuulli naalagaaffeqatigiinermik patajaallisaarusuttup Danmark nunatsinnut tunngasunik suliaqarnerusariaqarsoraa. Peqqinnissaqarfiup Danmarkimit akisussaaffigineqaqqilernissaa Atassummit isumaliutersuutigineqareernikuuvoq.

- Naalagaaffimmut uterteqqinneqarsinnaaneranut tunngasoq misilereerparput. Inuup peqqissusaa naalagaaffinngorniarnermi qitiutinneqartussaanngimmat, inuup peqqissusaa qaqugukkulluunniit salliummat. Taannali pisinnaanngitsoq uppernarsereernikuuarput, Aqqalu Jerimiassen oqarpoq.

AAMMA ATUARUK Peqqinnissaqarfik danskinit akisussaaffigineqartariaqarnersoq Atassummit isumaliuutigigaat

Danskit peqqinnissaqarfimmut akisussaasuulissappata, qanoq sunniuteqassanersoq pillugu qulaajaasoqarnissaa Atassutip Inatsisartut siorna ukiaanerani ataatsimiineranni siunnersuutigaa. Amerlanerussuteqartulli siunnersuummut akerliullutik taasipput.

Peqqinnissaqarfilli suli ilungersorfiusoq, Aqqalu Jerimiassen erseqqissaavoq. Tassanilu danskinik suleqateqarluni qanoq aaqqiisoqarsinnaanersoq pillugu Atassut ujartuileruttorpoq. Oqartussaaffinnillu Danmarkimit tigusinani Danmarkip peqqinnissaqarfimmi akisussaanerulersinnissaa naapertuttoq Atassutip siulittaasua isumaqarpoq.

- Peqqinnissaqarfipput eqqartorneqarpat, aap taamaaliorsinnaavugut, Aqqalu Jerimiassen oqarpoq.

AAMMA ATUARUK Naleraq: Det skal være nemmere for ikke-danske at få lov til at arbejde som læge eller sygeplejerske

Aamma Naleraq peqqinnissaqarfimmut aaqqiissuteqarnissamik qineqqusaaruteqarpoq. Peqqinnissaqarfimmi sulinissamut Danmarkimi akuersissuteqartuinnaanngitsut nunanili allani akuersissuteqartut nunatta peqqinnissaqarfiani atorfinitsinneqarsinnaasariaqartut, Naleraq isumaqarpoq.

Atassulli Danmark peqqinnissaqarfimmik pitsanngorsaanissamut peqataatikkusunneruaa.

- Aningaasaqarnikkut ataatsimut sumut tamanut aningaasaleeqatigiinneq taavalu suleqatigiinneq eqqarsaatigissagaanni naalagaarfeqatigiinnerup iluani takorloorsinnaasagut sorpassuupput, naalagaaffeqatigiinnermut atatilluta inuk qitiutillugu suliniarnitsinni inuup inuunera pingaarnerutittuaannartussaagatsigu.