Naleqqap nunanit allanit nakorsanik atorfinitsitsinissaq ajornannginnerulersinniaraa

- Uagut nalinginnaasunngortinniarparput, nunani allani akuerisaasut peqqinnissaqarfitsigut qulakkeerinnissinnaasut nunatsinnut immikkut pappiararsunngikkaluarluni ikiuukkiartorsinnaanissaat, Pele Broberg oqarpoq.

Nunatta peqqinnissaqarfiani sulisussarsiorneq ilungersunartoq oqaatigineqartareerpoq. Peqqinnissaqarfimmilu sulisussat Danmarkimi akuersissummik peqqaartussaagamik Danmarkimit soorlu nakorsanik peqqissaasunillu tikisitsisarneq nalinginnaasuuvoq.

Peqqinnissaqarfilli nunanit amerlanerusunit sulisussarsiorsinnaassaguni ilungersunnginnerussasoq, Naleqqamit isumaqarput.

AAMMA ATUARUK Allamiut peqqinnissamik suliallit nunatsinni atorfinilertorsinnaalertut

Nunaniilli allanit sulisussarsiorneq ajornakusoorpoq.

- Danskisut oqalunnissaq, danskit kulturiannik qaammaasaqarnissaq assigisaallu piumasaqaataapput. Taamaammat Danmarkimi akuersissutitaarnissaq nunanit allaneersunut ajornakusoortorujussuuvoq, Pele Broberg oqarpoq.

Taamaammat nunani allani akuersissuteqartunik sulilersitsisinnaanissaq periarfissaasariaqartoq, Naleqqamit isumaqarput.

AAMMA ATUARUK Peqqinnissaq pillugu ataatsimiititaliarsuaq siullermeertumik ataatsimiittoq

Peqqinnissaqarfimmili sulisut suliaminnik iluamik naammassinnissinnaanissaat qulakkiigassaammat, Danmarkimi naalagaaffik akuersissuteqartussaavoq. Nakorsallu nunanit allaneersut nunatsinni suliaminnik naammassinnissinnaanissaat qanoq qulakkeerneqassanersoq, politikerit kisimiillutik aalajangigassarinngikkaat, Pele Broberg oqarpoq.

- Soorlu danskit suliassatik qulakkeersinnaagaat qulakkeernikuugipput. Taanna politikerit aalajangigarinngilaat, kisianni nakorsat peqatigalugit 1980-ikkunni suliaanikuuvoq. Taanna suliaminnik qaammaassallit suleqatigeqqissaarlugit suliassaavoq, Pele Broberg oqarpoq.

Nakorsalli nunanut allanut suliartorusuttut nunarput suliartorfissatut kisiat qinigassarinavianngilaat. Norgemi sulinermi atukkat pitsaanerummata danskit ilaat Norgep peqqinnissaqarfianut suliartortartut, Pele Brobergip assersuutigaa.

AAMMA ATUARUK Peqqinnissaqarfiup sulisussarsiornera unammillernartupilussuusoq

Nunanillu allanik unammillerniaraanni nunatsinnik nittarsaassinissami suliassarpassuaqartoq, Pele Broberg isumaqarpoq.

- Taamaammat una siunnersuut atuinnarlugu ajornartorsiutigut tamaasa iluarsisinnaanngilagut. Kisianni allat suli amerlanerusut aperisinnaanngornissaannut aqqutissiuissaaq, Pele Broberg oqarpoq.