Peqqinnissaq pillugu ataatsimiititaliarsuaq siullermeertumik ataatsimiittoq
Kalaallit Nunaanni innuttaasut peqqissusaannik ilisimatusarfimmit nunatsinni peqqissutsimik misissuinerit, ilisimatusarnikkullu paasisat kingulliit saqqummiunneqarput.
Naalakkersuisut tusagassiuutinut taama nalunaaruteqarput.
Nunatsinni nakorsaaneqarfimmit nunatsinni peqqissutsip killiffia pillugu aamma saqqummiussisoqarpoq kiisalu peqqinnissamut aqutsisoqarfimmit peqqinnissaqarfimmi sinaakkutarineqartut suliassanillu naammassinninniartarneq pillugit saqqummiussisoqarluni.
2020-p qaammataani siullerni pingasuni peqqinnissaq pillugu ataatsimiititaliarsuup sulinissaa aallartittussaasimagaluarpoq, corona virusili akimmisaartitsisoq, ataatsimiititaliarsuup siulittaasua, Ulrik Blidorf, tusagassiuutinut nalunaarummi allappoq.
- Suliakkiissut malitassarput naapertorlugu piffissaliunneqartoq qaangerneqareersoq paasivarput. Taamaattumillu Naalakkersuisut saaffiginissaat pilersaarutigaarput, Ulrik Blidorf allappoq.
Peqqinnissaq pillugu ataatsimiititaliarsuarmik pilersitsineq Inatsisartunut ilaasortap, Tillie Martinussenip siunnersuutiginikuuaa.
Ataatsimiititaliarsuaq ukioq manna aningaasanut inatsimmit 6 millionit koruuninik ukiuni pingasuni aningaasaliiffigineqarpoq.