Peqqinnissaqarfik danskinit akisussaaffigineqartariaqarnersoq Atassummit isumaliuutigigaat
![](/sites/default/files/styles/image_934x467/public/article_images/indgang_sana.jpg?itok=1pjCoY9g)
Peqqinnissaqarfik danskinit akisussaaffigineqaqqilissappat nunatsinnut qanoq sunniuteqassanersoq Atassutip misissortikkusuppaa.
Danmarkip nunatsinni peqqinnissaqarfik akisussaaffigilissappagu, tamanna aningaasatigut, sulisoqarnikkut kiffartuussinikkut peqqissartunullu qanoq sunniuteqassanersoq pillugu Atassut
qulaajaatitserusuppoq.
Peqqinnissaqarfiup nunatsinnit akisussaaffigineqalereertup ingerlanneqarnera pitsaasuusimanngitsoq, partii isumaqarpoq.
- Kukkusimavugut, immitsinnut artukkersimavugut taamaammallu iliuuseqartariaqarpugut, Atassummit oqarput.
AAMMA ATUARUK Peqqinnissaqarfiup sulisussarsiornera unammillernartupilussuusoq
Partiilli allat siunnersuummut tapersiinngillat.
Namminersulivikkiartoratta akisussaaffitsinnik Danmarkimut tunniussissanngitsugut, Siumumit Partii Naleqqamiillu isumaqarput.
Uagut akisussaaffigigipput, akisussaaffillu nammineerluta naammassiniartariaqaripput, taavalu Danmark akisussaasuulissagaluarpat, peqqinnissaqarfimmi ajornartorsiutit qaangernavianngikkigut, Nunatta Qitornaanniit isumaqarput.
AAMMA ATUARUK Qiimmatsassimaanermiit unittooqqanermut
Inuit Ataqatigiit peqqissutsimut immikkut naalakkersuisoqarneranut innersuussillutik peqqinnissaqarfiup siunissaanut isumalluarlutik oqarput. Misissuisoqassappallu nukippassuit aningaasarpassuillu atorneqartariaqarnissaat Inuit Ataqatigiit ernummatigaat.
Aamma Demokraatit siunnersuutip itigartitsissutigineqarnissaanik piumasaqarput.
Danmark peqqinnissaqarfimmik akisussaasuutilerniarutsigu aamma allanik ajornartorsiuteqartoq, peqqissutsimut naalakkersuisoq, Anna Wangenheim oqarpoq.
Namminersorneq pillugu inatsit nunatta suliassaqarfinnik Danmarkimit tigusinissaanut taamaallaat malittarisassaqartoq, taanna nassuiaavoq. Tassalu oqartussaaffinnik nunatsinnit Danmarkimut tunniussinissamut malittarisassaqanngilaq.
AAMMA ATUARUK Nalunaarusiaq: Nunatsinni peqqinnissaqarfimmut aningaasartuutit nunanut allanut sanilliullugit ikinnerupput
Taamaammat suliassaqarfiit Danmarkimut akisussaasuuffigilertinniarneqarpata, Danmarkimik isumaqatigiinniartariaqaqqaassaagut. Taamaattoqassappallu nunarput Danmarkilu oqartussaaffinnik nunatsinnit Danmarkimut tunniussinissamut piumassuseqartariaqassapput.
Tamannalu Naalakkersuisut pilersaarutiginngilaat.
Peqqinnissaqarfimmili ajornartorsiuteqartoq, naalakkersuisup nassuerutigaa. Naalakkersuisulli iluarsiissutissanik sulissuteqartut ilanngullugu oqarpoq.