Demokraatineersoq: Danmarkimi ussassaarinerit sulisussarsiornerillu aqqutissaanngillat
Peqqinnissaqarfimmi sulisussaaleqinerup aaqqiissuteqarfiginissaanut Danmarkimi ussassaarinerit sulisussarsiornerillu aqqutissaanngillat, Demokraatit peqqinnissaq pillugu oqaaseqartartuat, Malene V. Rasmussen taama erseqqissumik isornartorsiuivoq.
- Tunngaviusumik ajornartorsiutaasut aaqqiiviginissaannut aqqutissaasorinngilara, Malene Vahl Rasmussen oqarpoq.
AAMMA ATUARUK Peqqinnissaqarfiup sulisussarsiornera unammillernartupilussuusoq
Sulisussaaleqinerup ajornartorsiutaanerata annertunera aaqqiissuteqarfiginissaanullu eqqortunik iliuuserineqartoqarnera naalakkersuisup Doris J. Jensenip nassuerutigereeraalu taama isornartorsiuivoq.
Tamannarpiarlu Demokraatit peqqinnissaq pillugu oqaaseqartartuata isumaqatiginngilaa.
AAMMA ATUARUK Peqqinnissaq pillugu kattuffiit Namminersorlutik Oqartussat iliuuseqaqquaat
- Isumaqarpunga ajornartorsiutaasup tikinnissaanut immikkoortut allat misissuiffigineqartariaqartut, uanilu isumaqarpunga aaqqissuussaanerup aningaasaqarnerullu ilusilersugaanerani qanoq allannguuteqartoqarsinnaanera misissorneqartariaqartoq, Malene V. Rasmussen oqarpoq.
Sivisunerusumik atorfeqarsinnaasut
Malene V. Rasmussen isumaqarpoq Avannaamioqatigiit killiiniittut tassa Island, Savalimmiut Norgellu Avannaa isumassarsiorfigineqarsinnaasut, taakkulu peqqinnissaqarfinni sulisussaaleqinermi taartaasussarsiortarfiit aqqutiginagit sivisuumik nunamiissinnaasunut qanoq pilerinarsaasarnersut isumassarsiorfigineqartariaqarsorai.
AAMMA ATUARUK Pitsanngorsaasoqarnissaa Nakorsat peqatigiiffiannit ujartorneqarpoq
- Aningaasarsiassat suliffimmilu atugassarititaasut pillugit misissugassaqarpoq. Aamma suliffiup avataani periarfissat, ilaquttallu nassarusukkunikkit meeqqerivinni inissaqartitsineq imaluunniit inissaqarneq apeqqutaasinnaapput. Pissutaasut assigiinngitsorpassuit pingaaruteqarsinnaapput. Tamakku misissuiffiginissaat pingaaruteqarpoq.