Coronap ajornartoortitsinera akunnittarfinni unnuisunut ikilisitserujussuartoq
Kisitsisit akunnittarfinni unnuisimasunut tunngasut kingulliit Nunatta Naatsorsueqqissaartarfiata saqqummiussai takullugit akunnittarfiuteqartuulluni qiimmaallaataasimanavianngillat.
Nunatsinni akunnittarfinni ukioq manna unnuisimasut siornamut sanilliullugit affaannaapput.
Akunnittarfinni unnuisimasut januaarip qaammataaniit septembari ilanngullugu 2019-imi piffissamut tassunga sanilliukkaanni procentinik 41,3-nik ikileriarsimapput.
Ukioq manna qaammatini qulingiluat ingerlaneranni unnuisimasut 44.944-usimapput. Unnuinerit 128.569-iusimasut, taakku akunnittarfinnit, vandrehjemminit unnuisarfinniillu allanit 51-iusuni.
Tamanna 2019-imi piffissamut pineqartumut sanilliullugu 50,1 procentinik ikileriarneruvoq.
Ilulissani appariaat 52,0 procentiulluni annertunerpaavoq.
Tusarfik: Kalaallit Nunaanni Naatsorsueqqissaartarfik
Ilulissani ajornerpaavoq. Ilulissani akunnittarfinni 2020-mi qaammatini qulingiluani unnuisut siorna piffissamut tassunga sanilliukkaanni 52 procentinik ikinnerupput.
Pissutsit taamaannerinut coronavirusip ajornartoortitsineranik pissuteqartoq Ilulissani akunnittarfimmi Hotel Icefiordimi pisortaq Anders Gadeberg oqarpoq.
Taakkuami kaaviaartitaat affaannanngorsimapput.
AAMMA ATUARUK Akunnittarfinni unnuisut ikileriarujussuartut
- Unnuisut, kaaviaartitagut aaqqissuuttakkatsigullu allatigut isertitagut ikilerujussuarput, Anders Gadeberg oqarpoq, nangipporlu:
- Illoqarfimmut tamarmut nunalumi tamakkerlugu takornarialerisunut ukioq ajorluinnarpoq,
2021-p ajunnginnerunissaa angallannermullu killilersuutit oqartussanit qasukkarneqarsimanissaa taassuma neriutigaa.
Akunnittarfik aqullaartoq
Nuummi akunnittarfik nutaaq, Hotel Hans Egede A/S-imit pigineqartoq HHE Express, coronavirusip ajornartoortitsineranit aamma eqqugaavoq.
Akunnittarfik nutaaq qaammatip aappaa avillugu ammatereerlugu novembarip 13-iani qaqugumuunersoq matusariaqarsimagitsik pisortaq oqarpoq. Matunerani sulisut sisamat soraarsinneqarput.
- HHE Expressip maannaagallaq ammatiinnarnissaanut tunngavissaqanngitsoq paasivarput, Jørgen Bay-Kastrup oqarpoq.
AAMMA ATUARUK Ilulissani takornariartitsinermi siunnersuisoqatigiit: Mattusimalluni sulinngiffeqarluni angalarusuttoqarnavianngilaq
HHE Express marsip aallaqqaataani ammaqqissinnaassasoq taanna neriuppoq qularlunili. Pisortat angallannermut killilersuinermut isersimaannarallarnissamillu kaammattuutiminnik qasukkaassannersut apeqqutaavoq.
Hotel Hans Egedemi sulisut suliffimmik annaanissaat ernummatigigaat pisortaq oqarpoq.
- Soorunalimi nikallungapput, suliffeqaannarnissartik qularutigigamikku. Naluarpummi qanoq sivisutigisumik pissutsit imaassanersut, Jørgen Bay-Kastrup oqarpoq.
