Akunnittarfinni unnuisut ikileriarujussuartut
Nunatta akunnittarfii coronavirusi pissutigalugu angalaqqusaannginnermit killeqarfinnillu matoqqatitsinermit eqqorneqartorujussuusut Nunatta Naatsorsueqqissaartarfiata kisitsisaataasa nutaat uppernarsarpaat.
Akunnittarfinni ukiup affaani siullermi unnuisimasut siorna piffissap taamaalinerani unnuisimasunut naleqqiullugit 46,5 procentinik ikileriarsimasut, unnuinerillu 42,3 procentinik ikileriarsimasut kisitsisit takutippaat.
Kisitsisillu taakku Ilulissani akunnittarfiup pisortaanut tupaallatsitsinngillat.
- Uagut namminneq kisitsisitsinnut naapertuupput. Kisianni akunnittarfiutillit tamarmik ukioq manna eqqorneqarput. Siorna allaanerujussuuvoq, arlalinnummi pitsaasorujussuuvoq, Ilulissani Hotel Icefiordip pisortaa, Anders Gadeberg oqarpoq.
Neriulluarniarneq
Akunnittarfinni unnuinerit Ilulissani ikileriarnerpaapput, illoqarfiup akunnittarfiutaani unnuinerit 49,3 procentinik ikileriarlutik.
Kisitsisillu nikallornarsinnaagaluartut Gadeberg siunissamut neriulluarneruvoq. Nunatta iluanit takornariartoqarsinnaanera mianersortumik neriuuteqarnermut pissutaavoq.
- Isumalluarnarnerujartulerpoq. 2021-mut siulittuuteqarpallaarsinnaanngikkaluarluta, pitsaanerujartuaalerpasissoraara, akunnittarfimmi pisortaq Anders Gadeberg oqarpoq.
Hotel Icefiordimi juulimi aggustillu aallartinnerani akunnittut coronavirusip ajornartorsiortitsileqqammernerani unnuisut amerlassusaannut sanilliullugit amerlanerupput.
Ilaatigut "staycationimik", tassalu nunatsinneersut nunatta iluani suimiiffinnut allanut sulinngiffeqariartornissaannik kaammattuineq tamatumunnga pissutaavoq.
Akunnittarfinnilli ingerlatsisut tamarmik neriullualeriartunngillat. Nuummi Inuk Hostelsimit nunatsinneersunit unnuisoqartarnera iluaqutigigaluarlugit aningaasaqarnermut suli ernumassuteqarput.
Inuk Hostels Hotel Icefiordituulli kaaviiaartitanik 60 procentinik annaasaqarpoq, Inuk Hostelsili minneruvoq, tassanilu aasakkut isertitat ukiukkut isumalluutigineqartarlutik.
- Soorunami taanna staycation iluaqutaavoq. Kisianni aasaanerani kaaviiaartittakkagut annerpaatillugit, taavalu annaasagut taama amerlatigitillugit, ukioru qanoq iliornissarput ernumanartorujussuuvoq, Inuk Hostelsip pisortaa, Maren-Louise Poulsen Kristensen oqarpoq.
Nalunaarsuutit kinguaattooqqanerat peqqutigalugu missiliorlugu unnuisimasut 8,8 procentii kiisalu unnuinerit 13,7 procentii 2019-imi piffissami pineqartumi paasissutissaat tunngavigalugit missingersuutaapput.
