Brugseni RAL-imut kamappoq: Nerisassat 1,3 millioninik nalillit asiunerannut pissutaasut
Ulluinnarni atortussanik pisiniarfiit nerisassanik kingusippallaamik tikittoorsimanertik - imaluunniit Danmarkimit assartorneranni kukkusumik passunneqarsimanertik pissutigalugit eqqaasariaqaraangata, tamanna akisullunilu uuminarpoq.
Taama ulluinnarni atortunik niuertarfik Brugseni Royal Arctic Linemik isornartorsiunera tusagassiorfinnut nalunaarummi allassimavoq.
Brugseni naapertorlugu pisiniarfiit kinguaattoornerit kukkusumilluunniit containerinik nillataartitsisunik/qerititsisunik passussineq pissutigalugit nioqqutissanik pisiarinerani 1,3 millioner koruuninik nalilinnik igitsisariaqarsimapput. Tamanna naammagineqanngitsorujussuuvoq.
- Nerisassarpassuarnik eqqaaneq, kaaviiaartitanik annaasat, nioqqutissanik immikkoortiteraluni sulisutta sulinerujussuat, pisiniarfitsinni nutaanik pilersuisoqarsimannginneranik pisisartorpassuatta paasinnissinnaannginnerat. Taakku tamarmik qaavatigut alkiligassaapput, naatsorsuutigisarpassuarnik naammassinninngillat nerisassarpassuarnillu maanngaannartitsillutik, Brugseni allappoq.
Tamanna aggustimi ersarissilluinnarpoq, tassani umiarsuaq assartuut Tukuma Arctica sapaatit akunnerinik marlunnik kinguaattoormat. Pisiniarfinni ilisiviit imaarunnerisa saniatigut qaangerniagassaqartitsilerpoq Brugsenimullu aningaasartuuteqalersitsilluni.
- Pisiniarfiit tamarmik nioqqutissanik amerlasuunik amigaateqarput umiarsuup ataasiinnaap kinguaattoornera pissutigalugu, umiarsuarlu tikippat suliaq nutaaq aallartissaaq nioqqutissanik qaangiuttoorsimasunik eqqaalluni, sulisut qaavatigut suliakkersorneqarnertik pissutigalugu naammaginninnginnerat kaaviiaartitanillu aannaasaqarluni.
Ulloq tikiffissaq nutaaq ujartorneqarpoq
Brugseni naapertorlugu ulluinnarni atortussanik pisiniarfiutilik RAL-imit umiarsuit atlantikukkoortut tikittarnissaasa pilersaarusornissaannut kissaateqaqquneqarpoq. Brugsenip ilaatigut RAL-imut erseqqissaatigisimavaa kinguaattoornerit ikilisinneqartariaqartut containerillu nillataartitsisut eqqortumik passunneqarlutik.
Ilutigitillugu aaqqiissutissat ilaattut Brugsenimit tikkuarneqartoq tassaavoq, umiarsuit tikinnissaannut pilersaarummi nioqqutissanik nassarluni sapaatip akunneranut ulloq tikittarfiup tallimanngornermiit pingasunngornermut sisamanngornermulluunniit allanngortinneqarnissaa.
- Ingerlaarfissanik pilersaarusiornermi pisisartutta ilaasortattalu pisiniarnermut atatillugu ileqquisa eqqarsaatigineqartarnissaat pisariaqartipparput, tallimanngornerit arfininngornerillu pisiniarfinni ullutut tunisiffissatut pingaarnerpaajuarlutik. Taamaattumik pingasunngornerit sisamanngornerillu apuuffissatut pitsaanerungaarlutik, Brugseni allappoq.
Brugseni naapertorlugu tikittarfissamik nutaamik ulluliineq RAL-imut aamma iluaqutaassaaq, tamannami ullormik ataatsimik marlunnilluunniit kinguaattoortoqartillugu sapaatip akunnerata naanerani nioqqutissanik tunniussisoqartariaarutissammat, Brugseni allappoq.
- RAL-ip kissaatitsinnik piniarnikuusaminnik tusaarniarnissaat neriuutigisimagaluarparput, qaangerniagassattali aaqqiivigineqarnissaata akerlianik, Nuummut tikittarfissamik nutaamik ulluliinissamik siunnersuuterput ”piviusorsiunngilaq”-mik akineqaannarpoq. Tunngavilersuutaanik tusartinneqanngilagut.
Royal Arctic Line-mik KNR oqaaseqartitsiniaavoq.
