Narsarsuup siunissaa suli nalornissutaasoq: - Nukinginnaqaaq

Qaqortumi mittarfik ammarpat Narsarsuarmi suliffeqarfiit innuttaasullu qanoq pineqassappat?

Apeqqut taanna ukiorpassuarni akissutissarsiniarneqarsimagaluarpoq, Kommune Kujallermilu borgmesteri Malene Vahl Rasmussen (D) maanna akissutiserusulluni ilungersorpoq. Qaqortumi mittarfittaaq pisortatigoortumik qaammat ataaseq qaangiuppat atoqqaartinneqassaaq, taamaalillutillu Narsarsuarmi suliffiit piuneerutissapput.

Pissutsini maanna atuuttuni Narsarsuarmut timmisartoqqaariarluni Qaqortumut qulimiguulimmik ingerlaartoqartarpoq. Qaqortumili mittarfik ammarpat Narsarsuaq qulimiguulinnut mittarfinngussaaq.

Taamaakkaluartoq Kujataani nunaqarfiup siunissaa suli ilisimaneqanngilaq.

- Nukinginnaqaaq, aamma qangarujussuarli taakku nalunaarutigineqareertussaagaluartut isumaqarpunga, Malene Vahl Rasmussen Qanoruumut oqarpoq nangillunilu:

- Qaammat ataaseq sinnilaarlugu qaangiuppat allanngortoqaliivippoq, innuttaasulli suli apeqqutissaqarput.

Taamaattumik borgmesterip ilaatigut nakorsiartarfik, illut Namminersorlutik Oqartussanit pigineqartut ikummatissanillu pilersuineq qanoq pineqassanersut paaserusuppaa.

Apeqqut taanna borgmesteriusimasuttaaq Stine Egedep (IA) 2021-mi decembarimi akissutissarsiniarsarigaluarpaa. Apeqqulli tamanna suli erseqqissumik akineqarsimanngilaq.

Aalajangiisinnaanngitsut

Tamatuma saniatigut Malene Vahl Rasmussenip pisortat Narsarsuarmi suliffeqarfiutaat qanoq pineqassanersut aamma apeqqutigaa. Ilaatigut Pilersuisoq, Polaroil Nukissiorfiillu.

- Kommunemi Namminersorlutik Oqartussallu ataanni suliffeqarfiit taakku tamavimmik kalluarneqartussaapput, taanna oqarpoq.

Narsarsuup siunissaa suli nalorninartuuvoq. Assi © : KNR

Nunaqarfiup akunnittarfianut aamma tamanna atuuppoq. Greenland Airportsip ullumikkut akisussaaffigaa, kommunilu akisussaaffimmik  tigusinissaminut neqeroorfigineqarpoq. Naalakkersuisulli nunaqarfiup siunissaa qanoq ikkumaarnersoq suli akissutissaqartinngimmassuk, kommuni suli aalajangiisinnaanngilaq.

- Qanoq atorneqarsinnaanera pillugu susassaqartut assigiinngitsut oqaloqatiginikuuagut, aalajangertoqartinnaguli uagut taakku suleriaqqiffigisinnaangilagut, taamaammat susoqarniarnersoq aalajangiisariaqarput, uaguttaaq kommunemi suliagut naammassiniassagatsigit, Malene Vahl Rasmussen oqarpoq.

Sulineq ingerlasoq

Attaveqaasersuutinut naalakkersuisoq Aqqaluaq B. Egede (IA) aperigaanni, suliffeqarfiit siunissaat pillugit naalakkersuisut aalajangiinnginnerini apeqqut pingaarutilik ataaseq akineqartariaqarpoq:

- Tassa aamma inuit qassit Narsarsuarmiinniarnersut apeqqutaasorujussuugami, apeqqutit tamakkua aamma qulaajarneqarnissaat pisariaqarpoq, taanna oqarpoq.

Greenland Airportsimi Air Greenlandimilu sulisut Narsarsuarmiit Qaqortumut nuunneqarpata qassit nunaqarfimmiiginnassanersut nalunarpoq. Greenland Airports nunaqarfiup suliffiisa ullumikkut annersaraat.

Aqqaluaq B. Egedeli Narsarsuarmi pissutsit suli paasiniarneqartut erseqqissaavoq.

- Tassa aalajangiiffigisassat paasissutissallu tunngaviusut maannakkut katersorlugit suliaqartoqartoq nalunngilara. Taannalu pillugu Kommune Kujalleq ataatsimeeqatigeqqittussaavarput, taanna oqarpoq.

Qineqqusaarutaasoq

Greenland Airportsip sulisui qanoq amerlatigisut Narsarsuarmiit Qaqortumut nuunniarnersut pillugit suliat suli ingerlammata, kisitsisinik Greenland Airports nalunaaruteqarsinnaanngikallarluni allakkatigut ilisimatitsivoq. 

Air Greenland sisamanik Narsarsuarmi maanna sulisoqartoq, pingasullu Qaqortumut nuuttussaasut, attaveqatigiinnermut ingerlatsisup allakkatigut paasissutissiissutigaa.

Narsarsuarmi inissiat inueruttussat ingerlatseqatigiiffiillu qanoq ingerlariaqqissanersut taamaammat suli nalunartoq, naalakkersuisoq oqarpoq.

- Ineqarnermut tunngasortai tassa massakkut qulaajarneqarput, uagut Naalakkersuisoqarfitta suleqataaffigisaanik. Makkua aamma ingerlatseqatigiiffiit inuiaqatigiinni annerusumik minnerusumilluunniit pigisagut, assersuutigalugu Nukissiorfiit qanoq siunissami inissisimasussaanerannut apeqqutit, assigiinngitsorpassuillu aamma Naalakkersuisoqarfinni allani tunngasut pineqarput, Aqqaluaq B. Egede oqarpoq.

Attaveqaasersuutinut naalakkersuisup Aqqaluaq B. Egedep (IA) Narsarsuaq qanoq pineqassanersoq suli erseqqissumik akissutissarsinngilaa. Assi © : KNR

Narsarsuup siunissaanut periarfissanik misissuisussamik innersuussutinillu saqqummiussisussamik 2022-mi suleqatigiissitaliortoqarpoq. Suleqatigiissitaq kingusinnerpaamik Qaqortumi mittarfiup ammarneranut atatillugu – tassa qaammat ataaseq qaangiuppat – innersuussutiminik tunniussissaaq.

Kommune Kujallermi paasissutissat naapertorlugit Narsarsuarmi 126-t maannakkut najugaqarput.

Narsarsuup siunissaa pillugu apeqqut Folketingimut qinersinermi aamma oqallisaangaatsiarpoq. Tassani Demokraatit tunuliaqutaralugit Patrick Abrahamsen aamma IA tunuliaqutaralugu Kalistat Lund Narsarsuup matuneqannginnissaanik qineqqusaarutiginnipput.