Ukiut pingasut qaangiuppata Arctic Winter Gameseqqittoqassaaq
Arctic Winter Games tulliuttoq ukiut pingasut qaangiuppata aatsaat ingerlanneqassaaq, sumilu ingerlanneqarnissaa suli aalajangerneqanngilaq.
Arctic Winter Games issittumi timersornermi unammiuaarnerit annersaraat, 1970-imilu aallarnerneqarmalli ileqqoq naapertorlugu ukiut allortarlugit unammiuaarfiusarluni. Ileqqorli ukiualunni allaanerussaaq.
- Arctic Winter Gamesimik aaqqissuussineq suliassarujussuuvoq. Ukiullu marluk qaangiuppata piareersimanissaq ajornakusoortoq paasigatsigu, Arctic Winter Games 2029-mi tulliani pissasoq aalajangiupparput, 2032-mi ingerlanneqaqqissalluni, John Rodda nassuiaavoq.
Ukrainemi sorsunneq tamatumunnga pissutaavoq. Ruslandimi nunap immikkoortui sorsunneq pissutigalugu Arctic Winter Gamesimut peqataasinnaanngillat. Arctic Winter Games tulliuttoq Ruslandimi illoqarfimmi Yamalimi pisussaagaluarpoq.
Ukrainemi sorsunneq
Ruslandimilu illoqarfiit Arctic Winter Gamesimut peqataasinnaanngimmata, unammiuaarfissatut inissisimajunnaarpoq, Arctic Winter Gamesimilu nunani tamalaani ataatsimiititaliaq allanik unammiuaartitsisussarsinngilaq.
- Nuna sorleq tulliani unammiuaartitsisuussanersoq aasap naannginnerani aalajangiiffigisinnaajumaarlugu neriuutigaarput, John Rodda oqarpoq.
Ileqqorisarli naapertorlugu ukioq ataaseq allortarlugu ukiuni akunnaatsuni Arctic Winter Gamesertitsisoqartarnera, ukiut arlaqanngitsut qaangiuppata ileqquulerseqqinneqassaaq.
- 2032-p kingorna ukioq ataaseq allortarlugu Arctic Winter Gamesertitsisoqartaleqqissaaq, John Rodda.
Arctic Winter Games 2026 Whitehorsemi Yukonimi arfininngornermi marsip 14-ianni naammassineqarpoq. Aaqqissuussisussanut erfalasup tunniunneqannginnera tamatumuuna allaanerussutigaa.
- Whitehorse unammiuaartitsilluaqaaq, unamminerit suliassallu allat naammassilluarneqarput. Kalaallit Nunaannit peqataasut amerlassusaat eqqarsaatigalugit 80-inik ujaminnannerat angusatsialaavoq, John Rodda oqarpoq.
Timersortartut nunatsinneersut 54-it Arctic Winter Gamesimi ukioq manna peqataapput, taakkulu timersuutini Arctic Sportsimi, Dene Gamesimi, nerrivimmi arsaararnermi, sulorarnermi snowboardernermilu unammipput. Nunatsinneersut timersuutini taaneqartuni tamani ujaminnapput.
