Borgmesterit akiitsorineqartut amigaatigaat
Akiligassat akilerneqanngitsut 900 millionit koruuniupput. Aningaasat innuttaasunut sullissinermut atorluarneqarsinnaagaluartut borgmesterit isumaqarput.
- Kommunip iliuuserisinnaasaralui pitsanngorsaanerit annertunerusinnaagaluarput akiitsut ikinnerugaluarpata, Qeqertalimmi borgmesteri Ane Hansen oqarpoq, nangillunilu;
- Innuttaasut nappaammik eqqorneqarsimanertik pissutigalugu qanimanartorsiortunut ilaqutaminik peqateqarsinnaanerannut atorneqarsinnaagaluarput. Meeqqat inuusuttuaqqanullu sullissinermi pitsanngorsaanermut minnerunngitsumillu utoqqartatta paaqqutarineqarneranut pitsanngorsaanermut atorneqarsinnaagaluarput.
AAMMA ATUARUK Pisortanut akiitsut amerliartuinnarput
Kommune Kujallermi ajornartorsiut aamma ilisimaarineqarluarpoq. Qanorlu aaqqiisoqarsinnaaneranik borgmesteri Kiista P. Isaksen siunnersuutissaqarpoq.
- Akiitsut nammatassiisarneri qanoq kinguneqartarnerat inuiaqatigiinnut ersarissumik paasissutissiissutigisariaqarparput, Kiista P. Isaksen oqarpoq.
Nuna tamakkerlugu innutaasut akiitsui 2017-ip naanerani 959 millionit koruuniupput. Taakkunannga Kommuni Kujallermi 95 millionit koruuniupput Qeqertalimmi 83 millionit koruuniusut.
Kommune Qeqertalik atuutilerneranit aaqqiissuteqareersimavoq.
- Qaammammusiallit qaammat naavikkaangat aatsaat aningaasarsisalerput ukioq maannaminngaanniik. Maluginiarneqartarmat qaammat naanissaa sioqqullugu aningaasarsiat tunniunneqaraangata ikigisassaanngitsut ingerlaannaq tigusaraat taavalu akiligassat PBS aqqutigalugu qaammat naanerani nusunneqartussat nusunneqarsinnaasaratik akiitsunngorlutillu, Ane Hansen oqarpoq.
AAMMA ATUARUK Akiitsoqaleraluttuinnarneq Randip ernummatigaa
Kommune Kujallermili piumasaqaatit annikinnerupput.
- Innuttaasunut kiffartuussinermi akiitsunut akiliiniartarnermut tunngatillugu qanimut siunnersuinerit ingerlattariaqarpagut, Kiista P. Isaksen oqarpoq.
Innuttaasunut artukkiinngitsumik akiliisitsiniartarnermik naalakkersuisut suliaqartut, aningaasaqarnermut naalakkersuisup Aqqaluaq B. Egedep oqaatigereerpaa.
Tamannali qinigaaffimmi tullermi aatsaat atuutilersinniarneqarpoq.
AAMMA ATUARUK Ilanngaassivik akiligassanittartunuinnaq atuutissaaq