Akiitsoqaleraluttuinnarneq Randip ernummatigaa
Demokraatit ugguarput.
- Ilanngaassiviup pilersinnissaa suli kissaatiginartorujussuuvoq uggornaqaarlu politikkikkut aalajangiiniarneq tamaanga unitsinneqarmat, Randi Vestergaard Evaldsen oqarpoq.
Ineqarnermut akiliutit, kiassarnermut, innaallagissamut pisortanullu akiitsut allat innuttaasunit pinngitsoorani akilerneqartarnissaat anguniarlugu akissarsinnginnermi akiligassat qulakkeeqqaarlugit aaqqiisalernissaq Naalakkersuisut siorna kinguartitaat Demokraatinit uggorineqarpoq.
AAMMA ATUARUK IIanngaassiviup atuutilersinneqarnissaa kinguartinneqarpoq
Innuttaasut pisortanut akiitsui 2017-p naanerani 1 milliard koruuningajaasut paasinarsivoq. Qanorlu iliuuseqarfigineqarsinnaanersoq aningaasaqanermut naalakkersuisup misissuiffiginiarpaa.
- Inuup ilaqutariillu akiliisinnaaneranik innarliinani akiliisitseriaatsimik pilersitsisoqarsinnaanera ilusilersorniarsarivarput, Aqqaluaq B. Egede oqarpoq.
AAMMA ATUARUK Pisortanut akiitsut amerliartuinnarput
Qinersisoqareerpat aatsaat atuutilersinnaavoq
Naalakkersuisullu akiliisitsiniartarnermik nutaamik aaqqissuussaminnik qaqugu Inatsisartunut siunnersuuteqassanersut oqaatigiuminaatsinneqarpoq. Inatsisartulli upernaaru ataatsimiilerpata saqqummiisoqassannginnerarpaa.
- Qinersineq sioqqullugu ilusiliinissaq ajornakusuussooq, qinigaaffiup tulliani suliassat piareernissaat naatsorsuutigivarpoq. Suliassat annertoorujussuugamik, Aqqaluaq B. Egede oqarpoq.
Taamaattoq Demokraatit aalajangiisinnaasuugaluarunik pisortanut akiitsulinnut akiliisitsiniartarfimmik piaarnerpaamik pilersitsissagaluartut, Randi Vestergaard Evaldsen oqarpoq:
- Iliuuseqartoqanngippat amerliartuinnassapput annertusiartuinnarlutillu. Tamannalu ajuusaarnartorujussuuvoq, Randi Vestergaard Evaldsen oqarpoq.
