Borgmesteri kommunip avinnissaa pillugu: Innuttaasut sunniuteqaqataarusupput
![Palle Jerimiassen](/sites/default/files/styles/image_934x467/public/article_images/palle_j.jpg?itok=1nrXQXIJ)
Avannaata Kommuniani kommunalbestyrelsip kommunip arlalinnut avinneqarnissaa aalajangerpaa. Tamanna sapaatip akunnerani siusinnerusukkut nalunaarutigineqarpoq.
Aalajangerneq tamanna innuttaasut kissaateqarnerannut tunngassuteqarluinnarpoq. Avannaata Kommuniani borgmesteri, Palle Jerimiassen (attaviitsoq) KNR-imut oqarpoq.
- Innuttaasut immaqa kommunitut ingerlatsinerput annertunerusumik uparuanngilaat, kisianni innuttaasut aana piumasaat: sumiiffimminni namminneq oqartussaaqataarusupput.
- Akisussaarusupput siunissamut nammineq ilusilersueqataarusupput tassa uani qanimut oqartussaaqataarusunneq annertunerusumik piumavaat, taanna oqarpoq.
Kommunip avinneqarnera qanoq iluseqassanersoq suli inissinneqanngilaq. Kisianni periarfissaasinnaasut marluk politikkikkut akuerineqarput.
Kommuni marlunnut avinneqarsinnaavoq, Ilulissat immikkut kommuneqalerluni taavalu Uummannaq, Upernavik Qaanaarlu ataatsimut kommuneqarlutik. Imaluunniit illoqarfiit sisamat tamarmik immikkut namminneq kommuneqalersinnaapput.
Innuttaasut tusarniarneqassasut
Kommunalbestyrelsimut ilaasortaq, Anthon Frederiksen (N) kommunip avinneqarnissaanut siunnersuuteqartuuvoq. Taassumalu tamanna kommunimi innuttaasunit toqqaannartumik kissaatigineqartoq ilanngullugu oqaatigaa.
Taassuma avannaani aalajangiinerup avinneqarneratigut iluaqutaasinnaasut takulluarsinnaavai.
- Siullertut uanga takorloorpara innuttaasut qaninnerusumik oqaloqateqarsinnaalissasut. Avannaata Kommunia eqqarsaatigissagutsigu innuttaasut qinikkaminnut attaveqarnerat pitsaanerulertussaavoq aammalu taamaalilluni inuit qanimut suleqatigalugit aqutsineq pitsaanerusumik ingerlalertussaavoq, taanna KNR-imut oqarpoq.
Kommunalbestyrelsimut ilaasortaq, Bendt B. Kristiansen (IA) Inuit Ataqatigiit sinnerlugit kommunimi innuttaasut kommunip avinneqarnissaanut atatillugu taasitinneqarnissaat siunnersuuteqarpoq.
- IA sinnerlugit siunnersuuteqarpunga aamma innuttaasut tamatumuuna kommune aaqqissuusseqqittarnerani innuttaasut sukumiisumik isumaat atorneqartarnikuunngillat, aammalu pisortat susassaqarfiini aaqqissuusseqqinnerit akisoorsuusarmata maanna isumaqarpunga aamma innuttaasut nalilersueqataassasut sukumiisumik ilumut ataanna aqqut atorusunneqarnersoq, taanna oqarpqo.
Oqartussaaqataarneq sammineqanngippallaartoq
Nunatsinni kommunit 2009-mi kommunerujussuanngortinneqarput. Bendt B. Kristiansenilu tamatuma ingerlanerani isornartorsiuisuni kisimiinngilaq.
Anthon Frederiksen akisussaasunut aamma isornartorsiuivoq:
- Isumaqarpunga kommunit kattussuunneqarnerannut tunngasut politikkikkut qitiusumik suliniarnermi piviusunngortinniarneqarsimanngittut, Anthon Frederiksen oqarpoq.
Avannaata Kommuniata pilersinneqarnerata kingorna ukiut ingerlaneranni kukkusoqarsimasinnaasoq borgmesterip, Palle Jerimiassenip nassuerutigaa.
- Uani massakkut ajoraluartumik kommunit aaqqissuunnerisa kingunerisaanik immaqa allaffissornikkut sulineq isigineqarpallaarsimavoq, taanna oqarpoq.
- Innuttaasut oqartussaaqataanerannut tunngasoq taanna amingartumik sammisimavarput.
KOmmunip avinneqarnissaanut siunnersuut kommunalbestyrelsip novembarimi oqaluuserissavaa tamatumalu saniatigut innuttaasunut taasititsisoqassalluni.