Kujataani politiit nannut pillugit marloriarlutik sapaatiummat nalunaarfigineqartut
Kujataani politiit nannut pillugit sapaatit akunnerata naanerani marloriarlutik nalunaarfigineqarput.
Nannullu pillugit politiinut siornatigut nalunaaruteqartunit amerlanerusut, Jack Nathansen politiineersoq oqarpoq.
Nannut marluk Qaqortup Saarlullu ungasinngisaani takuneqarsimasut politiinut ippassaq sapaammi nalunaarutigineqarput.
- Saarlormi ataaseq. Kisianni taanna nalunaarsorneqareerami piaralik, taqqamani ingerlaasaartoq. Taava uani alla akinnguatsinniittoq, kisianni uloriarnartorsiortitsinani, Jack Nathansen aqutsisuugallartoq oqarpoq.
Kujataani nanoqangaatsiarnera pillugu oqallittoqarpoq, borgmesterip savaatillillu peqatigiiffiata kujataani nannuttassat qaffanneqarnissaat naalakkersuisunut ilaatigut kissaatigaat.
Kujataani nannut amerliartuinnarnerat pinngortitaq pillugu nunarsuaq tamakkerlugu suliniaqatigiiffiata WWF-ip nunatsinni immikkoortaqarfiata aamma qisuariarfigaa.
Nannut aallaaneqaratik qimaatiinnarneqartarnissaat, WWF-ip nunatsinni immikkoortaqarfiata innersuussutigaa. Taamaammat suliniaqatigiiffik taanna upalungaarsimaniarnermut tunngatillugu karsinik sillimaniarnermut atortunik assigiinngitsunik imalinnik Kujataani savaateqarfinnut nunaqarfinnullu agguaavoq.
Nannullu amerliartornerat politiiniit ilisimaneqarpoq.
-Siorna aamma peqangaatsiarpoq, kisianni ukioq manna ingasavikkami. Jack Nathansen oqarpoq.
Nanoqangaatsiarneranullu ukioq manna sikorsuaqarnera peqqutaasoq qularutiginngilaa.
- Taanna qularnanngilaq, sikorsuit nalaanniikkami. Taavalu februarimili sikorsuaqaannavilluta.