Nannuttassat amerlineqarnissaat savaatillit aamma kissaatigigaat
![](/sites/default/files/styles/image_934x467/public/2024-07/polar-bear-on-a-rocky-mountain-in-svalbard-norw-2023-11-27-05-06-24-utc.jpg?h=10bf6ef3&itok=3rrK35Og)
- Kujataani nannut savaateqarfinnut tikiuttartut amerlatsikkiartorput, tamannalu savaatilinnit toqqissisimanartutut iisigineqanngilaq.
Savaatillit Peqatigiiffiit Suleqatigiissut (SPS) siulittaasuat Suulut Hansen taama oqarpoq.
Tassa Suulut Hansen Kujataani nannut amerliartuinnarnerannik Kujataani oqariartuuteqartunut ilannguppoq.
Kommune Kujallerup borgmesteria Stine Egede (IA) Kommune Kujallermi nannuttassat amerlineqarnissaannik naalakkersuisunut sisamanngormat kaammattuuteqarpoq. Taamallu kaammattuuteqarnera Suulut Hansenip isumaqatigilluinnnarpaa.
- Soorlu maannakkut aasaanerani savat neriniarfiini nanoqartarpoq, maannakkullu aamma piffissami kingullermi paasivarput neriniartitsivinni savat arlallit nannunit nerineqarsimasut. Pissutsit taama ittut ilungersunarput, aamma uumasuutigut uagut inuussutissarsiutigigatsigit taamatut uumasunit soorlu nannunit pinerlineqaraangata annaasaqaatigisarparput.
![](/sites/default/files/styles/image_934x467/public/2024-07/Suulut%20Hansen%20SPS%20formand%20INT%20KAL%20NJM%20Still.jpg?itok=wKXOtjNK)
Savaatillit Peqatigiiffiit Suleqatigiissut (SPS) kingullermik juunip 28-iani ataatsimeersuarmata Kujataani nannuttassat amerlineqarnissaannut savatillinnit 36-usunit 31-t isumaqataapput. Taamaammat politikerinit tusaaneqarnissartik, Suulut Hansenip neriuutigaa.
- Politikerit taakkuusussaapput nunatta qanoq aqunneqarneranik aalajangiisartut. Taamaattumik innuttaasut kissaataat neriuppugut tusaaneqassasoq, innuttaasummi amerlasuut pingaartumillu piniartut ilisimalluarpaat Kujataani nannut qanoq amerlatigisut. Neriuppugut tamakku tusaaneqarlutik pisassanik amerliliisinnaaneq anguniassagaat.
Nannunik qimaatitsiinnartarneq periarfissatut tulluartutut isiginngikkaat
Kujataani nannut amerliartuinnarnerat pinngortitaq pillugu nunarsuaq tamakkerlugu suliniaqatigiiffiata WWF-ip nunatsinni immikkoortaqarfiata aamma qisuariarfigaa.
Nannut aallaaneqaratik qimaatiinnarneqartarnissaat, WWF-ip nunatsinni immikkoortaqarfiata innersuussutigaa. Taamaammat suliniaqatigiiffik taanna upalungaarsimaniarnermut tunngatillugu karsinik sillimaniarnermut atortunik assigiinngitsunik imalinnik Kujataani savaateqarfinnut nunaqarfinnullu agguaavoq.
Upalungaarsimaniarmut tunngatillugu karsit taakkua ilaatigut qarlortaammik, ajunaalernermi qummoroortaammik, ajunaalernermi seqqortaammik imassartalimmik imaqarput.
Nannulli qiimaatiinnarneqartarnissaat aaqqiissutissaanngitsoq, Suulut Hanseni isumaqarpoq.
- Nanoq savaateqarfimmt qimaatinneqaruni tikitassaasa tulleq tassaavoq savaateqarfik alla, taamaattumik ajornartorsiut savaateqarfiup tullianut nuuginnarneqartussaavoq taavalu savaateqarfiit tulleriiaarlugit ingerlasussaalluni. Savaatillit tamanna ileqqorinngilaat, ajornartorsiut savaatillit namminneq anigorniarsarisaramikku. Taamaattumik qimaatitsiinnarneq periarfissatut tulluartutut isigineqanngilaq, taanna oqarpoq.
Taassuma ilanngullugu ersseqqissaatigaa, savaatillit kissaatiginngimmassuk nannut aallaaneqartariaqalernerannik.
- Nannut savaateqarfinnut tikiutinnginnerini piniartuninngaanniit pisarineqartarnissaat kissaatigivarput, taakkumi inuussutissarsiutigigamikku. Nannulli savaateqarfinnut tikiuttut allatut ajornartumik imminut inuttut imaluunniit uumasuutit illersorniarlugit pisarineqarsinnaasariaqartarput.
Ittoqqortoormiini aalisartut piniartullu peqatigiiffiat nannuttassat amerlineqarnissaannik apriilimi qinnuteqarpoq. Tasiilami Aalisartut Piniartullu Peqatigiiffiat nannutassat 15-inik amerlineqarnissaannik juunimi aamma qinnuteqarpoq.
Ittoqqortoormiinili Tasiilamilu aalisartut piniartullu peqatigiiffiissa qinnuteqaataat Naalakkersuisunit itigineqartinneqartut, aalisarnermut piniarnermullu naalakkersuisup Kim Kielsenip Inatsisartut suleriaasiat § 37 naapertorlugu apeqquteqaammut akissutaani allaqqavoq.
Kim Kielsen pineqartoq pillugu apersorniarlugu attavigisareerparput.