Borgmesteri sakkortuumik suaaruteqartoq: Nannuttassiissutigut amerlineqarlik!

Nannut amerliartuinnartut nunatta kujataani illoqarfinnut, nunaqarfinnut savaatilinnullu ukioq manna qanillattorput.

Kingullermik nanoq arnaviaq piaraalu Nanortalimmi qaammatip aallartinnerani takusaqartoqarpoq.

Tamannalu toqqissisimanngitsitsisoq, Kommune Kujallermi borgmesteri, Stine Egede (IA) naalakkersuisunut suaaruteqarnermini allappoq.

- Inuit aarlerillutik nunamut angalaniarunnaarput, tuperiarnissaq ornigineqarunnaarpoq, aasaaneranimi inuit ilaat tuperlutik aalisakkanik panertiteralutik ukiussamut eqqanaarsartarput. Tamakkulu pisinnaajunnaarpata inuiaqatigiit inuusaasiannut pissaqarniarneranullu annaasaq imaannaanngitsuussaaq, borgmesteri allappoq.

Nunatta kujataani innuttaasut tamatuma saniatigut qanillattortartut siusinnerusumit amerlanerusut maluginiaraat, Stine Egede allappoq.

- Nannut amerlisimanertik pissutigalugu kaallutik inoqarfinnut qunujunnaarlutik appakaattalernikuupput. Tamatuma saniatigut maani kommunitsinni savaateqarfinnut apuuttartut amerliartuinnarput. Tamannalu ukioq manna marlussoriarluni inunnut ajorluinnartumik kinguneqangajassimavoq nalaatsornerinnakkut pinngitsoortinneqarsimasimasumik.

Taamaammat nannuttassiissutit amerlineqarnissaat borgmesterip kissaatigaa.

Pisassiissutit qulinut amerlineqarlik

Nunatta kujataani piniartunut ukiumut sisamaannarnik nannuttassinneqartarput. Pisassiissutit taakku ukioq aallartinneranit qaammatit marluinnaat qaangiuttut marsip 13-iani nungunneqarput.

Taamanilu kujataani qinikkap, Anders Olsenip Siumumeersup pisassiissutit amerlanerulerseqquai.

- Sisamaniit amerlanerusunik, marloriaataasinnaapput imalluunniit qulit aqqaneq-marlulluunniit, taakkua nannuttassiissutigineqartalertuuppata Kujallermut qularnanngilaq taanna piniartutut inuussutissarsiutilinnut ilaqutariinnullu assut iluaqutaangaatsiassagaluarpoq, taanna piffissami tassani oqarpoq.

Borgmesterillu Stine Egedep isumaqatigilluinnarpaa. Taamaammat naalakkersuisut ukiumut ikinnerpaamik qulinik nannuttassiisalernissaannik kaammattuuteqarfigai.

- Pissutsit erloqinartut qaangerneqassappata maani Kommune Kujallermi ukiumut nannuttassat sisamaanaasut ikippallaarujussuaqaat. Pingaartumik nunaqarfiit kujallerpaat piniarnerinnangajammik inuussuteqartunut suli amerlanerusunik nannuttassinneqarnissaat pisariaqarluinnalerpoq, Stine Egede allappoq.

Ittoqqortoormiini aalisartut piniartullu peqatigiiffiata nannuttassiissutit amerlineqarnissaat apriilimi qinnuteqaatigaa. Qaammatit marluk qaangiuttut – juunimi – Tasiilami aalisartut piniartullu peqatigiiffiat assingusumik nannuttassiissutit 15-inut qaffanneqarnissaat qinnutigaa.

Qinnuteqaatilli taakku tamarmik naalakkersuisunit itigartitsissutigineqarpoq. Tamanna aalisarnermut piniarnermullu naalakkersuisup, Kim Kielsenip §37-imut akissutaani allassimavoq.

KNR-ip Kim Kielsen apersorniarsaraa.