Nanoq Magnusimit 3 meterinik ungasitsigisumiittoq: Qaasuppasiusappoq toqussinnaanagulu

Nanoq Qaqortup kangiani savaateqarfimmi Qeqertaasami marlunngormat qanillattormat pissanganarsimavoq.

Savaatillimmi nanup Qeqertaasamut marlunngornermi ullaakkut qanillattornera pissutigalugu nanumik toqutsinissamik qinnuteqarsimagaluarput. Taakkumi qanittumi uumasuuteqarput.

- Tassa itigartitaagatta ungoorniarsarisariaqarparput timaanut, Magnus Hansen oqarpoq. Oqartussat nunatta kujataani ukiumut nannuttassiissutit sisamat pisarineqareersimasut tunngavilersuutigaat.

Kisianni ajornakusuungaatsiarsimavoq, qamuteralaallu atorlugit qimaatitsiniarneq iluatsinngeqqaarsimavoq.

- Orpikkat akunnerisigut sumut tamaanga majuaqattaarlunilu pigami unittarlunilu piuminaatsorujussuuvoq, Magnus Hansen oqarpoq.

Magnus Hansenip qamuteralanniilluni nanoq 3 meterinik ungasitsigiinnalerluni tungiminut pangalissimasoq oqaatigaa.

- Sangujumananilu tunginnut pangalippiaanavikkami, immaqa 3 meterit qanillimmat sakkortusigaluarakkit snescooterit kaaviinnaleraluarlunga pissangaleraluarpunga. Qaasuppasiisannermik toqussinnaanagulu ernumanalaarpoq, Magnus Hansen oqarpoq.

Nannulli qunutillugu qimaatinnissaa naggataani iluatsippaat.

- Qanillilerlugulu pangalilluni sukkatsilluni malinninnialertarami, taamaammat ungavarlugu ungataaniit seqqorfigisarlugulu ungoorparput, taanna oqarpoq.

Nanoq Qaqortup kangiani Qeqertaasamut marlunngormat qanillattungaatsiarmat pissannganartorsiortoqaleraluarpoq. Assi © : Henrik Motzfeldt Egede

Meeqqat uumasullu pillugit ernumaneq

Nanoq sianigineqarani qanillisimasuuppat ulorianartorsiortitsisimassagaluartoq savaatilinnit qularutigineqanngilaq.

- Sianiginagu maani sakkoqarnani naapissimagaluaraanni navianartorujussuuvoq, Magnus Hansen oqarpoq, nangillunilu:

- Meeqqallu aneertarlutik taakku ernumanaqutaapput.

Nannumik ukioq manna aatsaat siullermeertumik Qaqortumukartoqanngilaq, taamaammat savaatillit piareersimasariaqarput.

- Nikilaassagaangama uanga aallaaseqartuaannartarpunga qoorortuuaraagaluarpoq, qoorortooq illumi piareeqqasimatipparput.

Soorunami sillimajuaannarpugut aamma uumasuutigut hestillu unnuleraangat isertillugit, imaluunniit ungalusamiikkaangata unnukkut ujakkalaartarlugit, nipiliuallakkaangata ujakkalaartarparput, Magnus Hansen oqarpoq.

Aalisarnermut piniarnermullu naalakkersuisoqarfiup savaateqarfiit arlallit nanumik takusimallutik nalunaaruteqarsimasut uppernarsarpaa.

Nanoq inunnut uumasunullu assersuutigalugu hiistinut navianartorsiortitsissagaluarpat toqunneqarsinnaasoq taakku KNR-imut allapput. Taamalu pisoqarnerani qoorortooq kaliber 30.06 atorneqaqqusaavoq.