Tusagassiuutit: Avannaata Kommunia arlalinnut avinniarluni aalajangerpaa

Avannaata Kommuniani kommunalbestyrelsip kommunip avinniarlugu aalajangerpaa.

Taamaammat borgmesterip, Palle Jeremiassenip (atttaviitsoq) Namminersorlutik Oqartussat kommunimut qinigaaffiup sivikinnerpaamik ukiumik ataatsimik sivikitsorneqarnissaanik qinnuteqaateqarfigisussanngorpai, taamaalilluni ikaarsaariarnissamut piffissaqartoqassammat.

Sermitsiaq.AG taama allaaserisaqarpoq.

Kommunalbestyrelsip kommunip avinneqarnissaanut siunnersuut novembarimi oqaluuserissavaat, tamatumalu saniatigut kommunimi innuttaasut avinnissaanut tunngatillugu ilaatigut taasitinneqarnissaanut siunnersuuteqartoqassalluni.

– Kommune qanoq avinneqassanersoq suli aalajangerneqanngilaq. Kommunalbestyrelsip immikkut ataatsimiinnerani tamanna oqaluuserineqassasoq naatsorsuutigaara, kommunalbestyrelsili aalajangerpoq kommune avinneqassasoq tamannalu naammassineqassaaq, Palle Jeremiassen tusagassiorfimmut oqarpoq.

Naleqqamit Anthon Frederiksen kommunip avinneqarnissaanut siunnersuuteqartuuvoq. IA-mit Bendt B. Kristiansen taasititsinissamut siunnersuuteqartuuvoq.

Sermitsiaq naapertorlugu kommunip avinneqarnerata kingunerisinnaasaanik kukkunersiuisut BDO-p nalunaajaataa kommunimit maanna utaqqineqarpoq.

Kissaateqarneq nunatsinni tamarmi kissaatigineqartoq

Avannaata Kommunia kommuniaqqanut avinneqarnissamik kissaateqartunik siulliunngilaq.

Nanortalik Kommune Kujallermit avissaarniarluni ukioq manna februaarimi suaaruteqarpoq. Maniitsoq Qeqqata Kommuniata ilaaniikkunnaarusulluni 2023-mi maajimi aamma nalunaaruteqarpoq.

Nunatta kangiani Kommuneqarfik Sermersuumit avissaarusuttoqarnera pillugu arlalerialuni oqaluuserineqartarpoq.

Inatsisartut kommunip aaqqissuussaaneranik nalilersuisoqarnissaa naalakkersuisunut peqqussutiginikuuaat.

Namminersorlutik Oqartussat inunnut 4274-inut apeqqutinik immersugassanik nassiussineratigut innuttaasut naammagisimaarinninnerannik misissuinerup kingorna taama peqqussuteqarput.

Avannaata Kommuniatali misissuineq taanna utaqqinianngilaa, taamaammat kommunip avinneqarnissaanut maanna aalajangiipput.

Sermitsiap nunamut imminermut naalakkersuisoq, Jess Svane oqaaseqartinniarsarigaluarpaa, taannali Palle Jeremiassenimit pisortatigoortumik saaffiginnittoqartinnagu oqaaseqarumanngilaq.